გურიის შემდეგ დიდთოვლობამ არანაკლებ საგანგაშო სიტუაცია შექმნა იმერეთის მაღალმთიან სოფლებშიც. მოვიკითხეთ ოთხი მუნიციპალიტეტის 20-მდე სოფლის მდგომარეობა. ვინც ხმა მოგვაწვდინა, მათი მონაყოლით ირკვევა, რომ თოვლის საფარი 1.5 მეტრს აღწევს, სავალი გზები გაუწმენდავია. მოსახლეობა ჩაკეტილია, ეწურებათ პროდუქტი, არ აქვთ შუქი, გაზი და წყალი.
სარჩევი
ვანი
გაზი არ მიეწოდება ვანის ხუთ მთიან სოფელს: სალხინოს, მთისძირს, ყუმურს, ძულუხს, სულორს.
“ბებო მყავს ჩაწოლილი, ბაბუა ეტლში ზის, გთხოვთ, ვინმე მივიდეს სახლში ჩემთან დახედოს, უბრალოდ, ღუმელი აუნთოს. ასევე, მყავს 6 წლის ძაღლი, მშიერი მყავს მეორე დღეა. რამე საჭმელი რომ მისცეთ, პური ან რამე… თავისი საჭმელი ახლახან გაუთავდა. ტელეფონი დამჯდარი აქვს ბებიაჩემს”, – დახმარებას ითხოვს ნიკუშა ლორთქიფანიძე, ვანის მუნიციპალიტეტის სოფელ სალხინოდან.
25 თებერვალს სოფელ ზედავანში თოვლით დაფარული გზა მოსახლეობამ გუშინ საკუთარი ძალებით, ჯიპებით გაწმინდა. გვითხრეს, რომ დღეს თოვლის საფარმა იმატა და თავად ვეღარ გაუმკლავდებიან.
“გზებს არ წმენდენ, კი ვართ მიბუქულები. რო რამე, გვპასუხობენ, ‘ნაციონალებმა’ ტრაქტორი არ დაგვახვედრესო. რა შუაშია ამდენი წლის შემდეგ ‘ნაციონალები’, ან რაში გვაინტერესებს? უბრალოდ, მოგვაქციონ ყურადღება”,- მოგვწერეს ვანის ერთ-ერთი სოფლიდან, სახელის და გვარის გამხელის გარეშე.
ვესაუბრეთ ერთ-ერთ ადგილობრივს ვანის სოფელ ამაღლებაშიც, რომელიც უგზოობის გამო მაღაზიამდე ვერ გადის და სახლში მოგროვებული პროდუქტებიდან მხოლოდ ნახევარი პურიღა დარჩა. ამ სოფელში თოვლის მოსვლის შემდეგ არც ბუნებრივი აირი მიეწოდებათ, არც – დენი.
სამტრედია და ბაღდათი
თოვლის საფარი 1.5 მეტრამდეა სამტრედიის მთიან სოფლებშიც – ოფეთში, გამოჩინებულსა და წიაღუბანი. გამოჩინებულში არც შუქი აქვთ, ‘დაუჯდათ’ ტელეფონები, ეწურებათ საკვები და მარტოხელა მოხუცები ძველ სახლებში არიან ჩარჩენილი. ბოლო 3 დღეა, გზის გასაწმენდად ასული მერიის ტრაქტორი არ დაუნახავთ.
“ვისაც კი ევალება, მოგვაქციონ ყურადღება, ჩვილი ბავშვები გვყავს სახლში. ვებრძვით სტიქიას, გურიაზე არანაკლებ დღეში ვართ ოფეთი-წიაღუბანი. გთხოვთ, ყველა ღონე იხმაროთ და გზა გაგვიწმინდოთ. არ ვართ დაუნახავები, მაგრამ საზღვარი აქვს ყველაფერს. მესმის, ცუდი მდგომარეობაა, დიდია თოვლის საფარი და რთულია, მაგრამ ჩვენც ცოდვები ვართ მეგობრებო… ტრაქტორი, რომელიც წმენდდა გზას, ტალაბაძის გორამდეა ამოსული მხოლოდ. თქვეს, რომ დილიდან განახლდება მუშაობა. მე უკვე ძაან მეშინია. არ გვძინავს იმის შიშით, არ ვიცით როდის რა იქნება! მძიმე თოვლია ძალიან”,- წერს სოციალურ ქსელში ლია გიგინეიშვილი, სამტრედიის სოფელ ოფეთიდან.
სოფელ გამოჩინებულიდან 80 წლის მამაკაცი ჰყვება, რომ ეზოში, 100 მეტრში აქვს საქონლის სადგომი და ისეთი დიდი თოვლია, 6 საათი მოანდომა ამ მანძილის გავლას, რომ ენახა, ძროხები ცოცხლები იყვნენ თუ არა.
დიდთოვლობაა ბაღდათშიც, საიდანაც მარტოხელა ქალმა ვიდეო გამოგვიგზავნა. გვთხოვა, სახლი ავარიულ მდგომარეობაშია და თუ შეძლებთ, დამეხმარეთო. ქალი ობჩისა და სვირის საზღვარზე ცხოვრობს.
ტყიბული
ჯერ კიდევ 2023 წლის გაზაფხულზე ვწერდით, როგორ უჭირთ ძმუისელ მასწავლებლებს დიდ თოვლთან გამკლავება. პრობლემა ორი წლის თავზეც არ მოგვარებულა.
“გუშინ ჩავრჩი ძმუისში და ისევ სოფლის მაცხოვრებლები მომეშველნენ. ამდენი ხანია თოვს და ერთხელაც არ გაუწმენდია გზა ტყიბულის მერიას. როგორ შეიძლება, ყოველ წელს შევახსენო მაგათი მოვალეობები. დავიღალე. ერთი და იგივე ხალხია სულ. უბრალოდ, არ ვადარდებთ და მორჩა”.
ისევ გარესამყაროსაა მოწყვეტილი ტყიბულის მაღალმთიანი სოფელი მუხურა, რომელზეც გასული წლის დეკემბერში ვწერდით.
ამ ფონზე, გუშინ, 25 თებერვალს, იმერეთის სახელმწიფო რწმუნებულმა ლევან ზალკალიანმა განაცხადა, საკუთარი ძალებით ვუმკლავდებით მდგომარეობას და მაქსიმალურად ვეხმარებით მოსახლეობასო. მისი თქმით, 12 მუნიციპალიტეტში 118 ტექნიკით მუშაობენ. თუმცა, არც არ დაუმალავს, რომ გარესამყაროს მოწყვეტილია 149 სოფელი, სადაც თოვლის საფარი ორ მეტრამდეა. ელექტროენერგია არ მიეწოდება 29 790 აბონენტს, ბუნებრივი აირი კი 237 აბონენტს.
