გარუსების წინააღმდეგ აქციები

თბილისსა და რეგიონებში ქვეყნის გარუსების საწინააღმდეგო აქციები ერთი თვის წინ დაიწყო და დღემდე გრძელდება. 

მთავარი მოთხოვნები უცვლელია – უსამართლოდ დაკავებული პატიმრების განთავისუფლება და ხელახალი არჩევნების დანიშვნა.

ხელისუფლება იგნორის სტრატეგიას არ ცვლის, საპროტესტო მოთხოვნებს ყურადღებას არ აქცევს და დათმობაზე არ მოდის.

რა იყო მთავარი ერთი თვის განმავლობაში? 

• აქციების სასტიკი და დანაშაულებრივი დარბევისას, დაშავდა 300-ზე მეტი პირი, მათი ზუსტი რაოდენობა უცნობია;

• თვითნებურად დააკავეს 500-მდე დემონსტრანტი. მათგან 46-ს სისხლის სამართლის წესით ედავებიან და დღემდე პატიმრობაში ტოვებენ. 

• დაშავდა, დააკავეს ან პროფესიულ საქმიანობაში ხელი შეუშალეს მედიის 90-ზე მეტ წარმომადგენელს – ჟურნალისტებს, ოპერატორებს, ფოტოგრაფებს. 

• დემოკრატიისთვის ძირის გამოთხრის და მოქალაქეებზე სასტიკი ძალადობის გამო დასავლეთმა მკაცრი ზომები მიიღო:
• ბრიტანეთმა, ბალტიის ქვეყნებმა და უკრაინამ სანქციები დაუწესა ბიძინა ივანიშვილს, ირაკლი კობახიძეს, “ქართული ოცნების” წევრებს და შსს-ს მაღალჩინოსნებს, მათ შორის, “ხარებას”;
• აშშ-მ ქართველ მაღალჩინოსნებს სავიზო შეზღუდვები დაუწესა, ხოლო ე.წ მაგნიტსკის სიაში შეიყვანა შს მინისტრი გომელაური და მისი მოადგილე;
• ევროპულმა საბჭომ გადაწყვიტა, უვიზო მიმოსვლა შეუჩეროს საქართველოს დიპლომატიური და სამსახურებრივი პასპორტის მფლობელებს;
• სანქციები დაანონსებული აქვს კანადას, გერმანიას და ჩეხეთს. 

• სატელეფონო საუბარი შედგა ემანუელ მაკრონსა და ოლიგარქ ივანიშვილს შორის. საფრანგეთის პრეზიდენტმა უკანონო პატიმრების გათავისუფლება და   გამოხატვისა და შეკრების თავისუფლების პატივისცემას მოითხოვა; 
• თბილისში სპეციალური ვიზიტით ჩამოვიდნენ ევროპარლამენტარები; მოგვიანებით კი ევროპარლამენტის პრეზიდენტმა საქართველოს პრეზიდენტი ბრიუსელში, პლენარულ სხდომაზე მიიწვია. 18 დეკემბერს სალომე ზურაბიშვილმა ევროპარლამენტარებს სიტყვით მიმართა, რასაც მხარდამჭერი ჟესტები და ტაში მოჰყვა.
• 14 დეკემბერს არალეგიტიმურ პარლამენტში ხმოსნებმა პრეზიდენტად ყოფილი ფეხბურთელი, მიხეილ ყაველაშვილი აირჩიეს. 
• ამავე დღეს საქართველოში ჩამოვიდა ევროსაბჭოს გენერალური მდივანი ალენ ბერსე.
• 20 დეკემბერს ეუთო/ოდირმა საპარლამენტო არჩევნების შესახებ კრიტიკული დასკვნა გამოაქვეყნა. 
• 21 დეკემბერს თბილისში 20-ზე მეტი მარში გაიმართა და რუსთაველის გამზირზე 200 000-მდე მოქალაქე შეიკრიბა. 
• 22 დეკემბერს სალომე ზურაბიშვილმა თქვა, რომ ის რჩება საქართველოს პრეზიდენტად და ოლიგარქი ივანიშვილი სასახლეში მიიწვია, ახალი არჩევნების თარიღის შესათანხმებლად. პრეზიდენტმა ივანიშვილს მოსაფიქრებელი ვადა 29 დეკემბრამდე მისცა. 
• 23 დეკემბერს გერმანიამ საქართველოში 237 მილიონი ევროს ღირებულების პროექტები შეაჩერა.
• 24 დეკემერს გამოქვეყნდა Human Rights Watch-ის ანგარიში, რომელშიც დემონსტრანტების წინააღმდეგ სამართალდამცავების ქმედებას სადამსჯელო ხასიათის უწოდეს.
• პროტესტის დაწყებიდან ერთი თვის თავზე დასჯილია აქციის სასტიკ დარბევებში მონაწილე 0 “სამართალდამცავი.”