ლენტეხში მჟავე წყლებისკენ მიმავალ გზაზე ახალი შენობა შენდება, რომელზეც ადგილობრივებმა მხოლოდ ის იციან, რომ ლენტეხის მერის, გია ონიანისაა. თუმცა, რისთვის აშენებს მერი ამ შენობას ან რამდენსართულიანი იქნება, არავინ იცის.
ლენტეხში ჩვენი ჟურნალისტები აგვისტოში იყვნენ და შენობის მიმდებარედ მყოფ ათამდე ადგილობრივს ესაუბრნენ. ვესაუბრეთ მუშებსაც, მაგრამ მათგანაც ვერაფერი გავიგეთ. ლენტეხში ამ შენობის ამბავი, ჩანს, რომ ყველას აინტერესებს, იმდენადაც კი, რომ ხალხმა თავად მოიფიქრა სხვადასხვა ვერსია, თუ რას შეიძლება აშენებდეს მერი ამ ადგილზე. ზოგმა გვითხრა, სასტუმრო იქნებაო, ზოგმა კარფურიო, ზოგმა სახლიო.
ჩვენ ამ შენობით იმიტომ დავინტერესდით, რომ ანონიმურმა წყარომ ივნისში გვითხრა, მერი შენობას უკანონოდ აშენებსო. “კულუარულად რაც გავიგე, მერი სასტუმროს აშენებსო. არც აბრა არის, არც არაფერი, უბრალოდ ყველამ იცის რომ შენდება და მერის არის, მორჩა… ნებართვის გარეშე ააშენებს სავარაუდოდ. როგორც უნდათ ისე აკეთებენ”, – გვითხრა ლენტეხის მცხოვრებმა. წყაროს ვინაობას ჩვენ მისი უსაფრთხოების გამო არ ვასახელებთ.
ამ მესიჯიდან რამდენიმე დღეში კი ფეისბუქზე ერთ-ერთმა მომხმარებელმა გამოაქვეყნა ფოტო წარწერით, რომ ლენტეხის მერი შენობას ტროტუარზე აშენებს.
ამ თემით დავინტერესდით, რადგან აშკარაა მერის მიერ თავისი ძალაუფლებისა და პოზიციის ბოროტად გამოყენება და გავლენით სარგებლობა.
კვლევა დავიწყეთ და ჯერ საჯარო რეესტრის დოკუმენტები შევისწავლეთ. ასე ვიპოვეთ, რომ 230 კვ.მ. ტერიტორია ამჟამად მერის ცოლის, ქრისტინე რევიშვილის კომპანიას, შპს “ბიზნესის მონიტორინგისა და უსაფრთხოების სამსახურს” 2023 წლის მარტიდან ეკუთვნის.
მერის ცოლის კომპანიამ ეს ნაკვეთი 10 000 დოლარად იყიდა სს “ტრანსპორტისგან.” ადგილობრივებმა გვითხრეს, რომ ადრე ამ ადგილზე სადგური იყო მოწყობილი და ქუთაისი-ლენტეხის სამარშრუტო ტაქსები ჩერდებოდნენო.
ღია მონაცემთა წყაროებში ლენტეხის მერიის მიერ გაცემული მშენებლობის ნებართვები შეტანილი არაა. რახან წყარომ გვითხრა, რომ მერი ამ ტერიტორიაზე შენობას ნებართვის გარეშე აშენებდა, ჩვენ ეს ამბავი უნდა გადაგვემოწმებინა. ლენტეხის მერიაში დავრეკეთ და ვკითხეთ, სად უნდა გვენახა ლენტეხის მუნიციპალიტეტში მიმდინარე მშენებლობების ნებართვები. გადაგვამისამართეს ინფრასტრუქტურის სამსახურის წარმომადგენელთან, ლევან ლიპარტელიანთან, რომელმაც არ იცოდა, ქვეყნდება თუ მსგავსი ინფორმაცია ვებგვერდზე.
შემდეგ კი ოფიციალური წერილით მოვითხოვეთ შესაბამისი დოკუმენტები. მოწოდებული მასალის ანალიზით გამოჩნდა, რომ 2023 წელს, მერის ცოლმა, ქრისტინა რევიშვილმა, შპს “ბიზნესის მონიტორინგისა და უსაფრთხოების სამსახურის” სახელით, მერიას კომერციული ცენტრის მშენებლობის პროექტი წარუდგინა.
პროექტის მიხედვით დაბა ლენტეხში ორსართულიანი შენობა უნდა აშენებულიყო. თუმცა, 2024 წლის მაისში გია ონიანს მისმა ცოლმა წერილით მიმართა და შეატყობინა, რომ შენობა-ნაგებობამ ფუნქციური დანიშნულება შეიცვალა, ასევე დაემატა ერთი სართული. ქრისტინა მის ქმარს, ლენტეხის მერს, სთხოვდა, გაცემულ ნებართვაში ცვლილებების შეტანას.
მერმა 12 დღეში შენობის ფუნქციის ცვლილება დაადასტურა, ხოლო აქედან 10 დღეში კი კომერციული ცენტრის ნაცვლად ახლა უკვე სამსართულიანი სასტუმრო “ბორჯღალი”-ს ორწლიანი მშენებლობის ნებართვა გასცა.
საინტერესოა ისიც, რომ მერიამ ნებართვაში შესწორება ჩვენთვის პასუხის გამოგზავნის დღეს შეიტანა. შეცვალა შენობის ტექნიკურ-ეკონომიკური მაჩვენებლები და ეს 14 მაისის ნებართვაში დაშვებულ ტექნიკურ ხარვეზს დაუკავშირა.
მშენებლობაზე აგვისტოში ვიყავით. ადგილზე მუშები იყვნენ, თუმცა მიმდებარედ არ გვინახავს აბრა, რომელიც სამუშაოს შესახებ ინფორმაციას უნდა აწვდიდეს დაინტერესებულ პირს. მაგალითად, ამგვარ აბრებზე დატანილია მშენებლობის ვადები, შემსრულებელი კომპანიის სახელი, დამკვეთის სახელი, შენობის ტიპი და დასრულებული შენობის ვიზუალი.
ასეთი რამ რომ ვერსად ვნახეთ, იქვე მყოფ მუშებს ვკითხეთ, პროექტი ხომ არ ჰქონდათ ამ შენობის. მათ გვითხრეს, ჩვენ არ ვიცით პროექტი, გია ონიანს ექნება, ეგ აშენებსო.
საინფორმაციო ბანერის გარდა პრობლემურია ისიც, რომ მშენებლობა იკავებს ტროტუარსაც. ამაზე ფეისბუქ პოსტშიც წერდნენ. ლენტეხში ჩასულებს ერთმა ქალმა, რომელსაც მშენებლობასთან ახლოს შევხვდით, გვითხრა: “გააფართოებენ ხო, როგორც უნდათ. აქ ვისაც რა უნდა ისე გასდის ყველაფერი. შეამცირებენ ტროტუარს, ამ რაიონში არაფერი არ იქნება პრობლემა”.
ასევე, არ არის შემოღობილი სამშენებლო არეალი და უსაფრთხოების წესები არ არის დაცული.
თუმცა, გასაკვირი არაა, რომ ზედამხედველობის სამსახური მერის მშენებლობას სათანადო ყურადღებას არ აქცევს და დარღვევებზეც თვალს ხუჭავენ. ზედამხედველობის სამსახურის უფროსი მერის ქვისლი, გიორგი გულბანია.
დავურეკეთ გულბანს და ვკითხეთ, როცა მშენებლობას საინფორმაციო ბანერი არ აქვს, რა ზომებს მიმართავენ ამ შემთხვევაში. მან გვითხრა, რომ ზედამხედველობის სამსახური, ზოგადად, კომპანიას ჯერ წერილობით ატყობინებს და შემდეგ იღებს შესაბამის ზომებს.
“ორჯერ ვაკეთებთ გაფრთხილებას და მერე ვიღებთ შესაბამის ზომებს, ანუ ვაჯარიმებთ შესაბამისად”, – გვიხსნის გულბანი.
შემდეგ მას ვუთხარით, რომ ჩვენ აგვისტოში და ნოემბერში ვიყავით ლენტეხში, სტალინის ქუჩაზე, სადაც ლენტეხის მერი, გია ონიანი სასტუმროს აშენებს და ვნახეთ, რომ იქ ბანერი არ იყო. გულბანმა ჯერ იმის მტკიცება დაიწყო, რომ მერს არანაირი კავშირი არ აქვს იმ შენობასთან და მერე კი მოგვატყუა, რომ ვითომ აბრა იყო განთავსებული.
მას ჩვენ 21 ნოემბერს ვესაუბრეთ. გვიმტკიცებდა, რომ მათ მშენებელი გააფრთხილეს და აბრა დადგეს, თუმცა, მერმა 21 ნოემბერს, სატელეფონო ინტერვიუს დროს, გვითხრა, რომ აბრას ამზადებენ და მალე დადგამენ.
გულბანი ვერც იმაში ხედავს პრობლემას, რომ სამშენებლო ტერიტორია შემოღობილი არაა, არადა, კანონით უნდა იყოს. გულბანი ამბობს, რომ ისეთ ადგილზე მიდის მშენებლობა, რომ საფრთხეს არავის უქმნისო.
“ლენტეხი არის ცოტა სპეციფიკური სამუშაო რეგიონი. ძლივს რაღაცა აშენდება და რაიონი გალამაზდება. შესაბამისად, ვცდილობთ რომ ყველანაირად ხელი შევუწყოთ, ოღონდ რამე აშენდეს და ოღონდ ჩვენ რაიონში რამე გალამაზდეს, ამისთვის ვართ მოტივირებული”, – გვითხრა გიორგი გულბანმა.
გულბანს ვკითხეთ, იმიტომ ხომ არ ხუჭავთ თვალს ამ მშენებლობის დარღვევებზე, რომ მერი თქვენი ნათესავია-თქო.
“ყველა ყველას ახლობელი არის, ძალიან პატარა რაიონია და ყველა ყველასი ვართ. შესაბამისად, ხო, ყველა ყველაფერს ითვალისწინებს”, – გვითხრა გიორგი გულბანმა.
საბოლოოდ, რა გაკეთდება ამ შენობაში, მერმა სატელეფონო ინტერვიუს დროს გვითხრა: “მცირე ზომის სასტუმრო გამოდის, რომელიც ლენტეხის ინფრასტრუქტურაში ძალიან ლამაზად ჩაჯდება. ლენტეხისთვის, ფაქტიურად, პირველი ინვესტიციაა და, წესით, სასიხარულო უნდა იყოს ყველასთვის. მოგეხსენებათ, ლენტეხში განვიცდით ასეთი ობიექტებს სიმცირეს. ტურისტი მოდის და გასაჩერებელი არა აქვთ ფაქტიურად”.
მერის ბიზნესი
ამ მშენებლობის ამბავს რომ ვიკვლევდით, ვიპოვეთ, რომ თურმე მერი კანონს გვერდს უვლის და ბიზნესსაქმიანობას ისევ ეწევა. შპს “ბიზნესის მონიტორინგისა და უსაფრთხოების სამსახურის” 67 პროცენტს ლენტეხის მერი 2018-2021 წლებში ფლობდა. შემდეგ, 2021 წელს მერად არჩევამდე რამდენიმე თვით ადრე, ეს წილი მის ცოლს გადაუფორმა. სინამდვილეში კი კომპანიის მმართველი დღემდე თავადაა.
ინტერნეტში ამ კომპანიის ნომერი ვიპოვეთ და ვინმე ჯეკოს ვესაუბრეთ. ვკითხეთ, რას საქმიანობს კომპანია და რა სახის მომსახურების მიღებაა შესაძლებელი მათგან. ჯეკომ გვითხრა, ფიზიკური დაცვის კომპანია ვართ, ასევე კამერების ქირაობაც შეიძლება ჩვენთან, დავილაპარაკოთო.
“ხელმძღვანელი კი ვარ, მაგრამ ჩემს ზევით არის უსაფრთხოების სამსახურის უფროსი გია ონიანი, მაგის ნომერს მოგცემთ და დეტალურად გეტყვით ყველაფერს”, – გვითხრა კომპანიის თანამშრომელმა ჯემალ თანდიაშვილმა. ასევე გვითხრა ისიც, რომ ონიანი კომპანიის გენერალური დირექტორი და დამფუძნებელია.
გია ონიანს 20 სექტემბერს სამუშაო საათებში დავურეკეთ, თურქული სამედიცინო კომპანიის წარმომადგენლად გავეცანით და ვთხოვეთ, ჩვენთვის მისი უსაფრთხოების კომპანიის პირობების შესახებ მოეყოლა. ვუთხარით, რომ თბილისში ოფის-მაღაზიას ვხსნიდით, სადაც ძვირადღირებული აპარატურა გვექნებოდა. მისგან კი, ვიდეო მონიტორინგი და ცოცხალი დაცვა გვჭირდებოდა.
გამოგვკითხა დეტალები, გვითხრა, ოფისი გვაქვს, სადაც ვიდეო მონიტორინგის გოგონები სხედან და ობიექტს თვალყურს ადევნებენო. ყველა დეტალი აგვიხსნა და ისიც გვითხრა, პირველი თვე საპილოტე მაქვს ხოლმე, დამკვეთს თანხას არ ვახდევინებ, ვზრდით ერთმანეთს და თუ ერთმანეთთან მუშაობა მოგვეწონება, შემდეგ ვაგრძელებთ მუშაობასო. ისიც ვკითხეთ, რამდენი ხანია რაც ამ ბიზნესში იყო.
“თავიდან ნიკორას მე ავუწყვე, მანდ ვმუშაობდი და დეპარტამენტს ვხელმძღვანელობდი მონიტორინგის და მერე ჩემ კერძო ბიზნესად ვაქციე. ეს, დაახლოებით, 2015 წლიდან დღემდე, არც რეკლამა მაქვს დიდად, იმიტომ რომ არ მჭირდება, ესეთი შინაურებით გადავდივარ ახალ ობიექტებზე”, – გვითხრა ონიანმა.
დავაზუსტეთ, ხელმძღვანელი და მფლობელი თავად იყო თუ არა, რაზეც გვიპასუხა, რომ ეს მისი საოჯახო კომპანიაა.
“ეს კომპანია ჩემი საოჯახო თემაა, ფაქტიურად ოჯახი ხედავს, ჩემი შვილი მუშაობს იქ, ჩემი მეუღლე და მე ეხლა ცოტა სხვა სამსახურზე ვარ გადართული. ჩემი შვილია თვითონ ეს კომპანია, ჩემი გაზრდილია ეს საქმე და ამიტომ რეკომენდაციებს და პირველ თემას მე ვაძლევ მითითებებს და მერე ჩემი ოჯახი ხედავს იქ”, – გვიპასუხა ონიანმა.
გია ონიანის “ცოტა სხვა სამსახური” ლენტეხის მერობაა.
საჭიროების შემთხვევაში ონიანი ჩვენი გამოგონილი კომპანიის დირექტორთან საუბარსაც დათანხმდა და თბილისში ჩვენთან შესახვედრად ჩამოსვლასაც. “მე თბილისში ხშირად მიწევს ჩამოსვლა და ჩვენ თუ გადავწყვიტავთ თანამშრომლობას პირველ შეხვედრას ჩვენ გავაკეთებთ”, – გვითხრა ონიანმა სატელეფონო საუბრისას.
ონიანის თქმით, მხოლოდ საქართველოში კი არა, მის საზღვრებს გარეთაც საქმიანობენ.
“მთავარია ინტერნეტის წვდომა იყოს, მე ევროპაშიც მაქვს რამდენიმე ობიექტი, იმას ვუყურებ, ჰოლანდიაში მაქვს ერთი საწყობი, ამერიკაში ერთ კერძო სახლს ვაქცევთ ყურადღებას”.
ამ საუბრიდან ზუსტად ორ თვეში ონიანს, როგორც ჟურნალისტმა, ისე დავურეკეთ და ვკითხეთ, იცოდა თუ არა რომ სამეწარმეო საქმიანობაში ამ დოზით ჩართულობით არღვევდა კორუფციის წინააღმდეგ საქართველოს კანონს. ამ უკანასკნელის მიხედვით, საჯარო მოხელეს არ აქვს სამეწარმეო საქმიანობის უფლება.
“არა, მე არ ვარ ჩართული. ჩემი ოჯახია ჩართული. მე, უბრალოდ, თქვენი ინტერესის გამო გაგეცით პასუხები. კანონის დარღვევა არის ის, როდესაც მე ოფიციალურად ვარ. მე ეხლა, თუ რეკომენდაციას გავუწევ ვინმეს ჩემი ოჯახის წევრს, თუ რა იქნება, თუ ვინ იქნება, ეგ არანაირი კანონის დარღვევა არაა. და თუ კანონის დარღვევა, შეგიძლიათ, მიმართოთ სასამართლოს და მიჩივლოთ, არ არის პრობლემა”.
გია ონიანი ლენტეხის მერად 2021 წელს დაინიშნა და დეკლარაციასაც ამ დროიდან ავსებს. ანტიკორუფციული ბიუროს საიტზე ონიანის სამი დეკლარაციაა გამოქვეყნებული. ამ დოკუმენტებში წერია, რომ ონიანსა და მის ცოლს 8 უძრავი ქონება აქვს, მაგრამ არცერთ ქონებას შესყიდვის ფასი არ აქვს მითითებული.
გია ონიანმა ინტერვიუს დროს გვითხრა, რომ დეკლარაცია სწორად აქვს შევსებული, ფასებიც მითითებული ჰქონდა და აქ რაღაც შეცდომაა. ფაქტია, რომ ოფიციალურად გამოქვეყნებულ დოკუმენტებში მისი ქონების ღირებულების გრაფაში ფასი არსადაა მითითებული.
ჩვენ ეს ქონება შევისწავლეთ და რეესტრიდან გამოვითხოვეთ ნასყიდობის ხელშეკრულებები. აღმოვაჩინეთ, რომ ონიანს, დეკლარაციაში მითითებული 0 ლარის ნაცვლად, შემდეგი თანხები უნდა ჩაეწერა:
- 1 000 ლარი გადაიხადეს წყალტუბოში, 1 843 კვ.მ მიწის ნაკვეთში 2020 წელს;
- 2 000 ლარი გადაიხადეს წყალტუბოში, სოფელ გეგუთში 1 572 კვ.მ. მიწაში 2020 წელს;
- 5 000 ლარი გადაიხადეს თბილისში, ბურძგლას ქუჩაზე 12 კვ.მ ავტოსადგომში 2019 წელს (ამავე კორპუსში ონიანის კომპანიას აქვს 50 კვ.მ ბინა);
- 4 460 დოლარი გადაიხადეს მცხეთაში 446 კვ.მ მიწის ნაკვეთში 2020 წელს;
- 29 000 ლარი გადაიხადეს თბილისში, გოთუას ქუჩაზე 111 კვ.მ ბინაში 2005 წელს;
- 41 400 დოლარი გადაიხადეს თბილისში 36.8 კვ.მ ბინაში 2021 წელს;
- 10 500 დოლარი გადაიხადეს თბილისში, ნუცუბიძის ქუჩაზე 23.4 კვ.მ ბინაში 2017 წელს.
2024 წლის იანვარში დამოუკიდებელმა კომისიამ, რომელიც ანტიკორუფციული ბიუროსთვის შესამოწმებელი თანამდებობის პირების დეკლარაციებს ირჩევს, სიაში გია ონიანიც შეიყვანა. დასაბუთებაში ვკითხულობთ, რომ მის მიმართ არის საზოგადოების მაღალი ინტერესი და ასევე, კორუფციის მაღალი რისკი.
ჩვენ ბიუროს დავურეკეთ და ვკითხეთ, მოიკვლიეს თუ არა გია ონიანის დეკლარაცია და აღმოაჩინეს თუ არა რაიმე დარღვევა. დაგვპირდნენ, რომ საკითხს შეისწავლიდნენ და დაგვიკავშირდებოდნენ. თუმცა, მათგან რაიმე ინფორმაცია აღარ მიგვიღია.
მასალაში გამოყენებული წყაროები
მასალა მომზადებულია EU4IM პროექტის ფარგლებში, ევროკავშირის ფინანსური მხარდაჭერით. კონტენტზე პასუხისმგებელია გამომძიებელ ჟურნალისტთა გაერთიანება “აი, ფაქტი” და მასალის სათქმელი შეიძლება არ ასახავდეს/ეთანხმებოდეს ევროკავშირის ხედვას.
