პრო-რუსი ბიზნესმენის, ლევან ვასაძის აქტიური მხარდამჭერი და ქსენოფობიურ-ჰომოფობიური მოძრაობის ერთ-ერთი სულისჩამდგმელი კონსტანტინე მორგოშიაა. ის იყო ყველა ისეთი გაერთიანების სათავეში, რომელიც რუსული ინტერესის გამტარი ხდებოდა ხოლმე. ახლაც ასეა.
მორგოშიამ თავისი “პოლიტიკურ-საზოგადოებრივი” საქმიანობა “პატრიოტთა ალიანსით” დაიწყო. 2016 წელს მცხეთის მაჟორიტარ კანდიდატად იყრიდა კენჭს. არჩევნებში ვერ გაიმარჯვა და მალევე პარტია დატოვა.
ეს ის დროა, როცა “ქართული მარში” შედარებით ფრთებგაშლილი იყო. მორგოშიამაც მას შეაფარა თავი და სათავეშიც მოექცა. “მარშის” ლიდერის, სანდრო ბრეგაძის თქმით, სწორედ ის და კონსტანტინე მორგოშია იყოფდნენ ოფისის ქირასა თუ სხვა აუცილებელ ხარჯებს. მორგოშია რამდენჯერმე იყო “ქართული მარშის” აქციების ორგანიზატორიც. 2020 წელს “ქართულ მარშს” ესტონეთის დაზვერვამ რუსეთიდან დაფინანსებული ძალა უწოდა. ანგარიშში ასევე ვკითხულობთ, რომ ბოლო წლებში “მნიშვნელოვნად გახშირდა“ პროპაგანდა, რომელიც თითქოს საქართველოში ტრადიციული ღირებულებების გაძლიერებას ემსახურება, სინამდვილეში კი მათი მიზანი საზოგადოებაში განხეთქილების ჩამოგდება და ქვეყნის დასავლური კურსიდან ჩამოშორებაა.
საბოლოოდ, მორგოშიას და “ქართული მარშის” გზებიც გაიყარა და მან ახალი პრორუსული ორგანიზაცია, “ალტერნატივა საქართველოსთვის” ჩამოაყალიბა. ორგანიზაცია ფლობს ფეისბუქის გვერდებსა და სატელევიზიო მაუწყებლობის ლიცენზიას. ქსენოფობიურ-ჰომოფობიური გზავნილებისა და ყალბი ამბების გავრცელების გამო ფეისბუქის ადმინისტრაციამ მათი ანგარიშები რამდენჯერმე დაბლოკა. მათ შორის კონსტანტინე მორგოშიას პირადი გვერდიც ხვდებოდა ხოლმე.
“ალტერნატივა საქართველოსთვის” ლევან ვასაძის მოძრაობის დიდი მხარდამჭერია. მათ შესახებ მეტს “აი, ფაქტის” მიერ მომზადებული ვრცელი მასალიდან შეიტყობთ. კონსტანტინე მორგოშიაც ვასაძის “ერთობა, რაობა, იმედის” გვერდით დგას და მომავალში ამ მოძრაობაში პოლიტიკურ როლსაც არ გამორიცხავს.
კონსტანტინე მორგოშიას ბიზნესი და უძრავი ქონება
მორგოშიას დიდი ოჯახი აქვს. შესაბამისად, უძრავი ქონება და კომპანიები მათზეცაა გაფორმებული. თავად კონსტანტინე 2 კომპანიის თანამფლობელია. შპს “მაგნუს დიზაინში” მორგოშია 51-პროცენტიან წილს ფლობს. კომპანიის საქმიანობა მშენებლობასთან, პროექტირებასა და დიზაინთანაა დაკავშირებული.
2015 წელს შპს “მაგნუს დიზაინს” საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ 82 ათასი ლარი გადაუხადა. სამინისტრო კომპანიას პირდაპირ, კონკურსის გარეშე უფორმებდა ხელშეკრულებებს.
მეორე კომპანია, რომელსაც მთლიანად კოტე მორგოშია ფლობს, შპს “კემ კონსტრაქშენია.” კომპანია საშუამავლო და საინვესტიციო საქმიანობას ეწევა.
მორგოშია 4 კომპანიის დირექტორიცაა. ამ კომპანიებიდან სამი მამიდამისს, ციალა მორგოშიას ეკუთვნის, ერთ კი არასამთავრობო ორგანიზაციაა. ა(ა)იპ “კავკასიონი” კონსტანტინე მორგოშიამ დავით ნემსაძესთან და ლაშა ამირეჯიბთან ერთად 2018 წლის აპრილში დააარსა. ორგანიზაციის წესდებაში წერია, რომ მისი საქმიანობა კავკასიაში კონფლიქტურ რეგიონებში მშვიდობის შენარჩუნება და ტყვეების გაცვლაში თუ კონფლიქტის რეგიონში სამედიცინო დახმარების შეტანის ხელშეწყობაა.
როდესაც ცხინვალში არჩილ ტატუნაშვილი წამებით მოკლეს, მორგოშია ოკუპირებულ ცხინვალში იყო გადასული. როგორც თავად თქვა, ცხედრის გადმოცემაზე სალაპარაკოდ. ამ დროს ის საქართველოს რიგითი მოქალაქე იყო, თუმცა, ოსების კონტროლირებად ტერიტორიაზე გადასვლა არ გასჭირვებია. როგორც ჩანს, ოკუპირებულ ტერიტორიაზე ის გარკვეული გავლენით სარგებლობს, რადგან მორგოშიამ ე.წ. საზღვარი ისე გადაკვეთა და გადმოკვეთა არავის დაუკავებია, როდესაც ზაზა გახელაძე ჩვენს კონტროლირებად ტერიტორიაზე დააკავეს და უკვე 11 თვეა ცხინვალის ციხეში ზის.
მორგოშიას ჩვენს მთავრობასთან სტაბილური ურთიერთობა აქვს. მთავრობამ მას თბილისის შემოგარენში დიდი ოდენობით უძრავი ქონება სიმბოლურ ფასად გადასცა. ამის შესახებ “აი, ფაქტი” ვრცლად გიყვებოდათ.
მორგოშიას მოქმედ მთავრობასთან მხოლოდ საქმიანი ურთიერთობა არ აკავშირებს. მისი ახლო მეგობარია “ქართული ოცნების” აღმასრულებელი მდივანი მამუკა მდინარაძე. როგორც მორგოშია საკუთარ ფეისბუქზე გამოქვეყნებულ პოსტში წერდა, მდინარაძე მისი შვილის ნათლიის და ბავშვობის მეგობრის უახლოესი ძმაკაცი იყო. “ნაციონალური მოძრაობის” მთავრობის დროს მდინარაძე დაკავებული იყო და მორგოშია ციხეში მოსაკითხსაც უგზავნიდა. მათი მეგობრობა მდინარაძის ციხიდან გამოსვლის შემდეგაც გაგრძელდა. შემდეგ კი მდინარაძე, როგორც ადვოკატი, მორგოშიას უფლებებს იცავდა. წინა მთავრობამ მორგოშია სახელმწიფო ქონების მითვისებისა და თაღლითობის ბრალდებით დააკავა. მორგოშიას თქმით, მაშინ “ნაციონალებმა” მამამისს გუდაურში, სასტუმრო “მარკო პოლოს” ხუთპროცენტიანი წილიც დაათმობინეს.
ამის შემდეგ მორგოშიამ, როგორც თავად ამბობს, ჭკუა ისწავლა და ქონებას საკუთარ სახელზე აღარ აფორმებს. სწორედ ამ ტაქტიკას იყენებს მორგოშია დღემდე. მისი უძრავი ქონების თუ ბიზნესის დიდი ნაწილი მისი ცოლის, მამიდის და მამის სახელზეა. მათ მფლობელობაში, ჯამში, 20 კომპანიაა. მორგოშიას მამა რამდენიმე თვის წინ გარდაიცვალა, თუმცა, ოფიციალურ დოკუმენტებში ქონება დღემდე მის სახელზე რჩება.
კონსტანტინე მორგოშიას მეორე ცოლი, 28 წლის მოდელი და დიზაინერი, ნინო გოზალიშვილია. მან ჯერ თბილისის სახელმწიფო უნივერსიტეტში ჟურნალისტიკის მიმართულება, შემდეგ კი GIPA-ში საზოგადოებასთან ურთიერთობის სამაგისტრო პროგრამა დაასრულა.
გოზალიშვილის ბიზნესსაქმიანობა 2019 წელს იწყება. ამ დროს მან შპს “ქართული” და შპს “ატელიერ 27” დააფუძნა. 2020 წლიდან კი ორი კომპანიის დირექტორიც გახდა. მათ შორისაა “საქველმოქმედო ფონდი კონსტანტინეც.” დოკუმენტების მიხედვით, ორგანიზაციის საქმიანობა სოციალურად გაჭირვებული მოსახლეობის დახმარებაა. თუმცა, ამ ფონდის საქმიანობის შესახებ ინფორმაცია ვერც სოციალურ ქსელში და ვერც ინტერნეტში ვიპოვეთ. კიდევ ერთი კომპანია, რომელსაც გოზალიშვილი ხელმძღვანელობს, შპს “საინვესტიციო ჯგუფი კონსტანტინეა.” ამ კომპანიაში ცოლმა ქმარი 2020 წლის ნოემბერში ჩაანაცვლა.
გოზალიშვილის სახელზე საჯარო რეესტრში 5 უძრავი ქონებაა რეგისტრირებული, ჯამში, 2,900 კვ.მ. მიწა შენობებით. მათ შორის ერთ-ერთია კიკეთში მშენებარე სამსართულიანი სახლი. გოზალიშვილმა 1,502 კვ.მ. მიწა შარშან 143 ათას ლარად შეიძინა. კიკეთში ცხოვრობს მორგოშიას თანამოაზრე ლევან ვასაძეც. აქვეა ლევან ვასაძის “იაკობ გოგებაშვილის სახელობის” სკოლაც, რომელშიც კონსტანტინე მორგოშიას შვილებიც სწავლობენ. სკოლის საფასური ერთ მოსწავლეზე 3,300 აშშ დოლარია, დღევანდელი კურსით 10 ათას ლარზე მეტი.
2020 წელი როგორც ჩანს მორგოშიას ოჯახისთვის ფინანსურად წარმატებული იყო. მისმა ცოლმა შარშან თბილისში, საბურთალოზეც შეიძინა 500 კვ.მ. მიწა, რომელშიც 50,000 ლარი გადაიხადა. ახლა ამ ტერიტორიაზეც 4-სართულიანი საცხოვრებელი სახლში შენდება, ორი მიწისქვეშა და ორი მიწისზედა სართულით. სახლის საერთო ფართ 647 კვ.მ. იქნება.
ნინო გოზალიშვილს ინტერვიუსთვის დავუკავშირდით. მან წერილობით გვიპასუხა და დაგვიდასტურა, რომ შპს ”ქართული” და “საქველმოქმედო ფონდი კონსტანტინე” ჯერ აქტიური არაა, თუმცა უახლოეს მომავალში გეგმავს მათ ამოქმედებას. შპს “ატელიერ 27” კი მისი ჰობია და ტანისამოსის დიზაინითაა დაკავებული.
“საინვესტიციო კომპანიას ვმართავ ოჯახის წევრებთან ერთად, თუმცა, ძირითადად, მე მიწევს გარკვეული სამუშაოების წარმოება. საინვესტიციო კომპანიის პროფილია სხვადასხვა ქვეყნიდან თანხების მოზიდვა და საქართველოში ინვესტირება დეველოპმენტში, სოფლის მეურნეობაში და ტურიზმში,“ – გვწერს ნინო გოზალიშვილი.
78 წლის ციალა მორგოშია კონსტანტინეს მამიდაა და წლების განმავლობაში კომპანიებიც მის სახელზე რეგისტრირდებოდა. ციალა მორგოშიას მინდობილი პირები არიან კონსტანტინე და ირაკლი მორგოშიები, რომლებიც უძრავ ქონებასა და კომპანიებს მამიდის ნაცვლად არეგისტრირებენ ხოლმე.
მორგოშიას აწგარდაცვლილ მამაზე, ემზარ მორგოშიაზე იყო რეგისტრირებული 7 კომერციული და 2 სააქციო საზოგადოების წილები. მისი კომპანიები სხვადასხვა სფეროში საქმიანობენ, დაწყებული სასტუმრო მომსახურებით, დასრულებული საბანკო სექტორით. ემზარ მორგოშიას კომპანიები სახელმწიფო შესყიდვებშიც მონაწილეობდა. 2011-2019 წლებში მისმა კომპანიამ, შპს
“ოქროს ველმა” 10 ათასი ლარის ღირებულების ხელშეკრულებები გააფორმა სხვადასხვა უწყებასთან. ყველა მათგანი პირდაპირ, გამარტივებული წესით, კონკურსის გარეშე შედგა.
ემზარ მორგოშია ფლობდა ორ ბინას თბილისში და ერთს ქობულეთში; სახლს ბორჯომში, ცემში, 3,721 კვ.მ. მიწით და თბილისში, ლისზე 4,648 კვ.მ. მიწის ნაკვეთით.
