fbpx
ძმები ფხაკაძეების ბიზნესები

რატომ დუმს ძმები ფხაკაძეების ბიზნესი?

ერთი კვირის წინ “საქართველოს ბიზნეს ასოციაციის” წევრები შეხვდნენ და იმსჯელეს იმაზე, უნდა გამოხატონ თუ არა ერთიანი პოზიცია ქვეყანაში მიმდინარე მოვლენების მიმართ. ამ შეხვედრას “ვისოლ ჯგუფიც” ესწრებოდა. გადაწყდა, რომ ასოციაციამ ერთიანი პოზიცია არ უნდა დააფიქსიროს.

“ვისოლ ჯგუფს” პროტესტის მიმართ პოზიცია არც მანამდე დაუფიქსირებია. “ვისოლი” არ შეუერთდა თავისუფალი ბიზნესის პლატფორმაზე განთავსებულ განცხადებას, რომლითაც კომპანიები პოლიტიკური ტყვეების გათავისუფლებას და ახალ არჩევნებს ითხოვენ. ამ განცხადებას დღეისთვის 2 426 ბიზნესი და კომპანია შეუერთდა.

უფრო ადრე კი, 2024 წლის გაზაფხულზე, ფხაკაძეებმა მხარი დაუჭირეს “რუსულ კანონს”, რომლის მიღება მაშინდელ პარლამენტს უწყვეტი, მრავალათასიანი პროტესტის ფონზე მოუწია და რომელსაც უარყოფითი შეფასებები მოჰყვა ევროკავშირისა და დასავლური დემოკრატიების მხრიდან.

რით აიხსნება “ვისოლ ჯგუფისა” და ძმები ფხაკაძეების დუმილი? ჩვენ მოგიყვებით იმ სამ ფაქტზე, რომელიც, შესაძლოა, ბიზნესმენთა დუმილის მიზეზი იყოს.

“ვისოლი” სახელმწიფო შესყიდვებში

სს “ვისოლ პეტროლიუმ ჯორჯიამ” სახელმწიფო შესყიდვებში მონაწილეობა “ნაციონალური მოძრაობის” მმართველობის დროს, 2010 წლიდან დაიწყო. “ვისოლ ჯგუფის” “შვილობილმა” კომპანია – “ვისოლ ავტო ექსპრესმა” კი – 2013 წლიდან.

მხოლოდ 2024 წელს სს “ვისოლ პეტროლიუმ ჯორჯიას” სახელმწიფო უწყებების მიერ გამოცხადებული 857 ტენდერი აქვს მოგებული. აქედან 852 გამარტივებული სახით, პირდაპირი შესყიდვით გაუფორმდა. ჯამში, ამ კონტრაქტების ღირებულება 8.7 მილიონი ლარია. 

აქედან 2 მილიონ ლარზე მეტი ღირებულების ტენდერი “საქართველოს მელიორაციისგან” მიიღო. “ვისოლისგან” ყიდულობს საწვავს სურსათის ეროვნული და სოფლის განვითარების სააგენტოები. სს “ვისოლ პეტროლიუმ ჯორჯია” აქტიურად ემსახურება მუნიციპალიტეტების ა(ა)იპებსაც. გასულ წელს მხოლოდ აიპებისგან 170 ტენდერი აქვს მიღებული. გარდა ამისა, წინასაარჩევნოდ 24 ტენდერი გაუფორმეს საოლქო საარჩევნო კომისიებმაც.

რაც შეეხება “ვისოლ ავტო ექსპრესს”, მან გასულ წელს 57 სახელმწიფო შესყიდვა გაიფორმა, ჯამში, 1.8 მილიონი ლარის. გამოდის, რომ მხოლოდ შარშან “ვისოლმა” 10 მილიონ ლარზე მეტი მიიღო.

“ვისოლ პეტროლიუმ ჯორჯიას” 2022-2023 წლებში რუსეთიდან შემოტანილი აქვს 65 030 ტონა ბენზინი და ბენზინპროდუქტები, “ვისოლ ავტო ექსპრესს” კი – 1 043 ტონა საავტომობილო ზეთი. ეს მონაცემები მოპოვებულია importgenius-ის საერთაშორისო ბაზაში, რომლის ადმინისტრაციაც საერთაშორისო ვაჭრობის მონაცემებს ოფიციალური წყაროებიდან აგროვებს.

ძმები ფხაკაძეები სამშენებლო ბიზნესში

2022 წლის შემოდგომაზე შპს “კოსტავა თაუერსმა” სახელმწიფოს მიერ გამოცხადებულ აუქციონზე შეიძინა ყოფილი „საზოგადოებრივი მაუწყებლის“ შენობა თბილისში, კოსტავას 68-ში. ქონებაში კომპანიამ 76.8 მილიონი ლარი გადაიხადა.

შპს “კოსტავა თაუერსის” მფლობელია შპს “ალმა”. “ალმას” სამეთვალყურეო საბჭოს წევრები არიან ვასილ, ლევან და სამსონ ფხაკაძეები. შპს “ალმას” 100-პროცენტიანი წილი კი მალტაში რეგისტრირებული კომპანიას, “გლობალ ინვესტორს ლიმიტედს” ეკუთვნის. 

საზ.მაუწყებლის ყოფილი შენობა, რომელიც ფხაკაძეებთან დაკავშირებულმა კომპანიამ იყიდა,  33 209 კვ.მ. მიწაზე დგას. თავად შენობა საბჭოთა დროსაა აშენებული და მისი ფართობი 23 649 კვ.მ-ა.

საზოგადოებრივი მაუწყებლის ძველი შენობა (საზმაუ)
საზოგადოებრივი მაუწყებლის ძველი შენობა, კოსტავას ქუჩაზე

“ჩვენ მივიღეთ გადაწყვეტილება, რომ დავიწყოთ დეველოპერული საქმიანობა, კონკრეტულად კი საცხოვრებელი ბინების მშენებლობა. სწორედ ამ მიზეზით შევისყიდეთ “საზოგადოებრივი მაუწყებლის” შენობა”, – აცხადებს სოსო ფხაკაძე.

საზოგადოებრივი მაუწყებლის ახალი შენობა კი თბილისში, პოლიტკოვსკაიას ქ. N31-ში განთავსდება. მშენებლობა 2020 წლის დეკემბერში დაიწყო და 2024 წლის ოქტომბერში დასრულდა. ტელევიზიისთვის ამ შენობის ასაშენებლად 85.3 მილიონი ლარი დაიხარჯა. ამჟამად იცლება ძველი შენობა და საზოგადოებრივი მაუწყებლის პერსონალი და ტექნიკა სრულად გადადის ახალ შენობაში. როდის დაიწყებს ახალი მესაკუთრე ამ ტერიტორიის განაშენიანებას, უცნობია.

ტელევიზიის ყოფილი შენობისა და მასზე დამაგრებული მიწის ნაკვეთის გაყიდვას სახელმწიფო ადრეც ცდილობდა, მაგრამ შვიდი აუქციონი ჩაიშალა. პირველი აუქციონი 2020 წლის 16 ივნისს გამოაცხადეს. მაშინ ქონების გასაყიდი საწყისი ფასი 122.4 მილიონი ლარი იყო. ბოლო აუქციონზე კი, ობიექტი, დაახლოებით 40 მილიონი ლარით იაფად იყო გამოტანილი.

იპოდრომის ახალი ბინადრები

ძმები ფხაკაძეები დეველოპერული ბიზნესის განვითარებაზე არანაკლებ ზრუნავენ. 2023 წელს მათმა კომპანიამ, შპს “ცენტრალ პარკ ავენიუმ” „ქართუ ფონდისგან“ შეიძინა 80 000 კვ.მ. ნაკვეთი იპოდრომის მიმდებარედ. აქაც, საზ.მაუწყებლის ტერიტორიისა არ იყოს, დაგეგმილია მრავალფუნქციური კომპლექსის მშენებლობა.

როგორც კომპანიის მიერ გასაჯაროებული პროექტიდან ირკვევა, ტერიტორია ორ ნაწილად გაიყოფა. პირველ ნაწილზე განთავსდება სავაჭრო, საოფისე და საცხოვრებელი შენობები, რომელთა მაქსიმალური სიმაღლე 25 სართული იქნება. მეორე ნაწილი უმეტესად განვითარდება სავაჭრო, დასასვენებელი, გასართობი, სპორტული და საცხოვრებელი ფუნქციებით, სადაც შენობების მაქსიმალური სიმაღლე 79 სართული იქნება.

იპოდრომი - ვისოლ ჯგუფის დაგეგმილი მშენებლობა
“ვისოლ ჯგუფის” დაგეგმილი მშენებლობა იპოდრომზე.
ფოტო: თბილისის არქიტექტურის სამსახური

სულ თავიდან იპოდრომის ტერიტორია 343 169 კვ.მ იყო. წლების განმავლობაში ამ მიწას ჯერ შპს “ჟოკეი კლუბი ფლობდა”, შემდეგ შპს “ინვესტ კაპიტალი” და შემდეგ ფონდი “ქართუ.” “ქართუმ” 2020 წელს მიწის ნაწილი, 272 628 კვ.მ თბილისის მერიას გადასცა. ნაწილი კი დღემდე მის მფლობელობაშია, თუმცა, 2023 წელს გაფორმებული ხელშეკრულებების თანახმად, 80 000 კვ.მ. მიწა უნდა გადავიდეს ფხაკაძეების კომპანიის, “ცენტრალ პარკ ავენიუს” საკუთრებაში. მედიაში გავრცელებული ინფორმაციის თანახმად, გარიგებაში ფხაკაძეებმა 85 მილიონი დოლარი გადაიხადეს. ჩვენ საჯარო რეესტრიდან ვითხოვდით “ქართუსა” და “ცენტრალ პარკ ავენიუს” შორის გაფორმებულ იმ ხელშეკრულებას, რომელიც ფასსა და ქონების გადაცემის სხვა პირობებს ადგენს. რეესტრმა ამგვარი დოკუმენტი, ოთხდღიანი ლოდინის შემდეგაც არ მოგვცა, მაშინ როცა კანონით იმავე დღეს უნდა მოეწოდებინათ, როცა განცხადება დავწერეთ.

ბოლო ოთხი წელია, თბილისის მერია გვპირდება, რომ იპოდრომის ტერიტორიაზე ცენტრალური პარკი მოეწყობა. სამუშაოები ფონდი “ქართუს” დაფინანსებით უნდა განხორციელებულიყო. ავრცელებდნენ ფოტო-მაკეტებსაც, თუ როგორი იქნებოდა ეს ტერიტორია, როგორი დასასვენებელი ინფრასტრუქტურა მოეწყობოდა.

„აქ მოეწყობა ცენტრალური პარკი, რომელიც არის ფონდ „ქართუს“ საჩუქარი ქალაქისთვის. ძალიან მიხარია, რომ ასეთი მნიშვნელოვანი პროექტი ხორციელდება. კიდევ ერთი, ძალიან დიდი რეკრეაციული სივრცე გაჩნდება ქალაქში, სადაც ყველა თაობის ადამიანი დაისვენებს. სამუშაოები ეტაპობრივად ხორციელდება. ტერიტორია მთლიანად არ ჩაიკეტება, რადგან დღესაც ბევრი ადამიანი სარგებლობს. პროექტი რამდენიმე ათეული მილიონი ჯდება. სამუშაოები დაიწყო და ვულოცავ თბილისს. დღეიდან 2 წელი დაჭირდება ამ პროექტის დასრულებას“, – თქვა კახა კალაძემ 2020 წლის ოქტომბერში.

იპოდრომთან გასაშენიანებელი ტერიტორია
იპოდრომთან გასანაშენიანებელი ტერიტორია. ფოტო აღებულია თბილისის არქიტექტურის სამსახურის ბაზიდან

თბილისის მერის დაპირებას თუ ვენდობით, ცენტრალური პარკი 2022 წლის ოქტომბერში უნდა გახსნილიყო. პირობა ვერ შესრულდა. სამაგიეროდ, ძმები ფხაკაძეები აპირებენ დადებული პირობის შესრულებას და ყოფილი იპოდრომის ტერიტორიის განაშენიანებას. 

“აქვე ვაცხადებთ, რომ ამ ლოკაციაზე, ისევე როგორც ნებისმიერ სხვა ადგილზე, ჩვენ მიერ განვითარებული უძრავი ქონება გამორჩეული იქნება დახვეწილი, გემოვნებიანი არქიტექტურითა და დიზაინით და არაერთ ხელმისაწვდომ სერვისს შესთავაზებს მომხმარებლებს. … პროექტის დეტალებს და მის მიმდინარეობას, ბუნებრივია, ეტაპობრივად გავაცნობთ საზოგადოებას”, – ამბობდა სოსო ფხაკაძე 2023 წელს.

იპოდრომის კომერციალიზაციას და განაშენიანებას აქტივისტები და სამოქალაქო მოძრაობა “იპოდრომი – უბატონო მხარე” რამდენიმე თვეა აპროტესტებენ. იპოდრომის ტერიტორიაზე და თბილისის საკრებულოსთან აქციებიც იმართება. თუმცა, მდუმარე ბიზნესმენები არც ამ საკითხზე საუბრობენ. არც კახა კალაძეს შეუწუხებია თავი იმის ახსნით, თუ რატომ ვერ მოაწყო დაპირებული ცენტრალური პარკი ყოფილი იპოდრომის იმ ნაწილზე, რომელიც მერიის საკუთრებაა.

ამჟამად მერიაში “ცენტრალ პარკ ავენიუს” მოთხოვნილი აქვს მშენებლობის უფლება იპოდრომის ყოფილ ტერიტორიაზე, სარეკრეაციო ზონა 1-ში.

სარეკრეაციო ზონა 1 წარმოადგენს სარეკრეაციო ზონას, რომელიც მდებარეობს განაშენიანებული ტერიტორიების საზღვრებში და მოიცავს გამწვანებულ ტერიტორიას (მაგ: ბაღი, ბულვარი, სკვერი, გაზონი და სხვა). აღნიშნულ ზონაში დაუშვებელია ყოველგვარი მშენებლობა, გარდა: ა) განათების; ბ) სარწყავი სისტემის;  გ) სარეკლამო ბილბორდის; დ) დეკორატიული გაფორმების ობიექტის.

ფხაკაძეები კი ამ ზონაში ითხოვენ ორი შენობის აშენებას, რომელთა სიმაღლე მიწის ზემოთ იქნება 157 მეტრი და 110 მეტრი. განაცხადი განხილვის პროცესშია. მერიამ 7 თებერვლამდე უნდა უპასუხოს კომპანიის ამ მოთხოვნას.

რა გადაწყვეტილებას მიიღებდა ეს კონკრეტული ბიზნესი, თუ “ქართული ოცნებისგან” სარგებელი არ ექნებოდა? ეს კითხვაც გვქონდა ძმებ ფხაკაძეებთან, სხვა რამდენიმე კითხვასთან ერთად. ვასილ და სოსო ფხაკაძეებთან დაკავშირება ვცადეთ, ვასილმა თავიდან ტელეფონზე კი გვიპასუხა, თუმცა გვთხოვა, ცოტახანში დაგირეკავთ, შეხვედრაზე ვარო. მოგვიანებით აღარ დაურეკავს, მეტიც, ჩვენს ზარებსაც აღარ უპასუხა. კითხვები გავუგზავნეთ სოსო ფხაკაძესაც. პასუხი არც მისგან მიგვიღია.

მასალა მომზადებულია EU4IM პროექტის ფარგლებში, ევროკავშირის ფინანსური მხარდაჭერით. კონტენტზე პასუხისმგებელია "აი, ფაქტი" და მასალის სათქმელი შეიძლება არ ასახავდეს/ეთანხმებოდეს ევროკავშირის ხედვას. 
signal 2024 04 23 144208 002

კომენტარები
Total
0
Shares
Next
კოჰაბიტაცია – თანაცხოვრების პოლიტიკური მოდელი
რა არის კოჰაბიტაცია

კოჰაბიტაცია – თანაცხოვრების პოლიტიკური მოდელი

კოჰაბიტაცია დემოკრატიული სისტემის ერთ-ერთი უმნიშვნელოვანესი ინსტრუმენტია,

თვალი მიადევნეთ სხვა ამბებსაც
Total
0
Share