Ბათუმში ზღვა სანაპირო ზოლს იტაცებს და ტურისტული ქალაქისთვის მნიშვნელოვანი პლაჟი თანდათან ქრება. არადა, სანაპირო ზოლის გამაგრებისთვის 60 მილიონი ლარი გვაქვს დახარჯული, ახლანდელი ხელისუფლების პირობებში.
ამ საკითხს ყველა მთავრობა სხვადასხვაგვარად უდგებოდა და სამუშაოებს თავის ჭკუაზე გეგმავდა, ერთიანი სტრატეგიის გარეშე. Შედეგად, პლაჟზე ხან ქვანაყარი ბერმა მოაწყვეს, დამცავი ნაგებობის სახით. Ხანაც, ხელოვნური კვება გადაწყვიტეს და ქვიშა-ხრეში ერთი ნაპირიდან მეორეზე გადაიტანეს.
გარემოს დამცველები და გეოლოგები Სანაპიროს დაცვის ამ არათანმიმდევრულ პრაქტიკას იწუნებენ. Პრობლემაა ისიც, რომ მუნიციპალური განვითარების ფონდმა გამაგრების სამუშაოები საერთაშორისო დონორებისგან ნასესხები ფულით დაგეგმა და საქმე თაღლითურ სქემებში გახვეულ კომპანიას ანდო. Როგორც ირკვევა, მათი რეპუტაციის შესწავლაზე არც უზრუნიათ.
მიუხედავად დამცავ ნაგებობაზე დახარჯული თანხებისა, მაინც ვერ ვიტყვით, რომ სანაპირო ზოლი დაცულია. 2022 წლის ნოემბრის შტორმმა ახალი ბულვარის ინფრასტრუქტურა კვლავ დააზიანა და აჭარის მთავრობას მის აღსადგენად დამატებითი ხარჯის გაწევა მოუწია.
“აი, ფაქტი” ხუთი თვის განმავლობაში იკვლევდა, რა საფრთხე ემუქრება ბათუმის სანაპირო ზოლს და რატომ არ გამოდგა ეფექტიანი პლაჟის გამაგრების მილიონიანი სამუშაოები. ჟურნალისტები ესაუბრნენ გარემოს დამცველებს, გეოლოგებს, ადგილობრივ ჟურნალისტებსა და პოლიტიკოსებს. მთავარი სირთულე კი იყო საჯარო ინფორმაციებზე დროული და ამომწურავი პასუხის მიღება.
ამ ამბავზე სრულ მასალას ქვემოთ მოცემულ ბმულზე წაიკითხავთ.
