“აი, ფაქტმა” მოლდოველ კოლეგებთან ერთად იკვლია, რა ისმის ჩვენი ქვეყნების მართლმადიდებლური ეკლესიების წიაღში. შევადარეთ, ქადაგებების შინაარსი უკრაინაში მიმდინარე ომზე, კოვიდ-პანდემიაზე, ადამიანის უფლებებზე, დასავლურ სამყაროსა თუ შიდა პოლიტიკურ ამბებზე. გამოჩნდა, რომ სასულიერო პირები გამოგონილი და დეზინფორმაციული ამბებით თავგზას ურევენ მათზე მონდობილ მრევლს, ამით კი რუსეთის წისქვილზე ასხამენ წყალს.
რას ქადაგებენ საქართველოს და მოლდოვის ეკლესიებში დასავლეთის წინააღმდეგ?
ჟურნალისტური გამოძიების ამ ნაწილში გიყვებით, როგორ გამალებით ზრუნავენ ქართველი და მოლდოველი მღვდლები, რომ ხალხს დასავლეთი მტერი, რუსეთი კი მოკეთე ეგონოს.
შევისწავლეთ სინოდის წევრების ნაამბობი, როგორც ამბიონიდან, ისე სოციალურ ქსელებში. ეს ეპისკოპოსები მაღალი იერარქიის სასულიერო პირები არიან, საქართველოს საპატრიარქოს მმართველ რგოლს ქმნიან, მათ სიტყვას მრევლში დიდი წონა და სანდოობა აქვს. სწორედ ამიტომ დავინტერესდით მათი განცხადებების წარმომავლობით.
- დასავლეთი რელიგიური და ტრადიციული ღირებულებების, მათ შორის ოჯახის მტერია;
- რუსეთი გვიცავს გარყვნილებისგან, ანუ დასავლეთისგან;
- ამერიკის საელჩო გვაკონტროლებს და თამაშის წესებს გვიდგენს.
ამ გზავნილების ნაკვალევს ზოგჯერ ჩრდილოელ მეზობლამდეც მივყავართ.
კრემლი და რუსული ეკლესია რომ უნისონში მოქმედებენ, ახალი ამბავი არ არის. პატრიარქ კირილს რუსეთის პრეზიდენტის დასაყრდენად მიიჩნევენ ევროპარლამენტის ანგარიშებშიც კი. ის ლოცულობს პუტინის ჯანმრთელობისთვის და სხვებსაც იმავეს მოუწოდებს.
მოსკოვის საპატრიარქოს ოფიციალური გაზეთის ყოფილმა რედაქტორმა სერგეი ჩაპნინმაც თქვა, ეკლესია რუსული სახელმწიფო პროპაგანდის ინსტრუმენტია, კირილი კი ოცნებობს იყოს პუტინის ეკლესიური ორეულიო.
ამ სიტყვების ჭეშმარიტებაში თუ ეჭვი შეგაქვთ, გაგახსენებთ, რომ 2021 წელს ბულგარეთის სასამართლომ რუსეთის პატრიარქი კირილი სახელმწიფო უშიშროების კომიტეტის (kgb) მეორე დონის აგენტად აღიარა, წელს თებერვალში გამომჟღავნდა კირილის აგენტობის ფაქტები შვეიცარიაშიც, კერძოდ ჟენევაში. მისი აგენტორული მეტსახელი “მიხაილოვი” იყო და მუშაობდა აშშ-ს წინააღმდეგ.
რუსი იდეოლოგის, ალექსანდრე დუგინის ქსელური ომის თეორიის მიხედვით, რუსულ ჰიბრიდულ ომში რელიგია მასებზე ზეგავლენის მოხდენის ერთ-ერთი საშუალებაა. ათწლეულებია, საქართველოს წინააღმდეგ რუსეთი ამ ტიპის ომს აწარმოებს. ამიტომ, გასაკვირი არაა, თუ პუტინზე მლოცველები და მისი პოლიტიკის გულშემატკივრები რუსეთის საზღვრებს გარეთაც მრავლად არსებობენ, მაგალითად, საქართველოსა და მოლდოვაში.
დასავლეთი, როგორც ქრისტიანობის და ტრადიციების მტერი
ქართული, რუსული თუ მოლდოვური ეკლესიის წარმომადგენლები ცდილობენ ტოლობის ნიშანი დასვან ევროპასა და ანტიქრისტიანულ ღირებულებებს შორის. სასულიერო პირები ამ აზრს ქადაგებების გზითაც აჟღერებენ და მრევლს დასავლური სამყაროს მიმართ შიშს უნერგავენ. მსგავს “საგმირო საქმეს” მიჰყო ხელი საქართველოს საპატრიარქოს სინოდის 41 წევრიდან ათმა. ეს ეპისკოპოსები არიან: იოანე გამრეკელი, სპირიდონ აბულაძე, სტეფანე კალაიჯიშვილი, იობი აქიაშვილი, ანტონ ბულუხია, დანიელ დათუაშვილი, იაკობ იაკობიშვილი, გიორგი ჯამდელიანი, ანდრია გვაზავა, ილია მეორე.
ისინი, ძირითადად, ევროპას და გარყვნილებას აიგივებენ. იყო შემთხვევები, როცა ევროკავშირში გაწევრიანებისთვის კანდიდატის სტატუსის მოპოვებასაც ცუდად გაჰკრეს კბილი.
სხალთელი მთავარეპისკოპოსი სპირიდონი არ ერიდება არც ყალბი და პროპაგანდისტული ინფორმაციის გავრცელებას. მაგალითად, 2015 წლის ნოემბერში ამბობდა, ინგლისში უკვე ჩვეულებრივი მოვლენაა მამა-შვილსა და დედა-შვილს შორის სექსუალური ურთიერთობებიც და ქორწინების რეგისტრაციაცო. მისი თქმით, გერმანიის სკოლებში ბავშვებს აშიშვლებენ და ისე ასწავლიან სექსუალურ ქცევებს.
საპატრიარქოს წარმომადგენლები გვედავებიან ხოლმე, მაინცდამაინც ჩვენს ნათქვამ სიტყვებს რატომ უკირკიტებთო. საქმე ისაა, რომ კვლევების მიხედვით, საზოგადოება ეკლესიის მესვეურებს მაღალ ნდობას უცხადებს. საერთაშორისო რესპუბლიკური ინსტიტუტის (iri) 2022 წლის კვლევის მიხედვით, საქართველოში ყველაზე მეტ კეთილგანწყობას ილია მეორე იმსახურებს. მის მიმართ დადებითადაა განწყობილი მოსახლეობის 88%.
მრევლს მიღმა, მათ ხშირად შეხება აქვთ სტუდენტებთან და არასრულწლოვნებთან, რომლებიც დეზინფორმაციის მიმართ უფრო მეტად მოწყვლადები არიან. მაგალითად, სხალთელი მთავარეპისკოპოსი სპირიდონი “წმინდა ტბელ აბუსერიძის სახელობის უნივერსიტეტის” რექტორია, ის ხელმძღვანელობდა ნინოწმინდის ბავშვთა სახლსაც. 2021 წელს ამ დაწესებულებაში ბავშვების დასჯის და ძალადობის მწვავე ფაქტები გამოვლინდა. სპირიდონ აბულაძემ თავისი პოზიცია სწორედ ამის შემდეგ გადააბარა მეუფე იაკობს.
მაღალი იერარქიის სასულიერო პირებისგან გვესმის, რომ დასავლური ფულით და ევროპული ფასეულობების სახელით ეკლესიაც იდევნება. ამ აზრს სხვადასხვა დროს ავრცელებდა როგორც ჭიათურისა და საჩხერის მიტროპოლიტი დანიელი, ასევე ბაღდათის მიტროპოლიტი ანტონ ბულუხია.
“ხომ არ გადავხედოთ ჩვენს არჩევანს, როცა ავირჩიეთ ევროატლანტიკური გზა…თვალი ხო არ გავახილოთ, თუ ეს არის ევროპის ფასეულობა – ეკლესიის სიძულვილი, ტრადიციების, ოჯახის სიწმინდის უგულებელყოფა, ჩვენ არ გვინდა ასეთი ევროპა,”- ამბობდა ბულუხია 2020 წლის მაისში.
უკვე მოგიყევით, რომ ქართველი და მოლდოველი მღვდლები უკრაინის ომს ღვთის რისხვად მიიჩნევენ. მათი თქმით, ეს ქვეყანა ცოდვებითაა დამძიმებული, მისდევენ გარყვნილებას, პრეზიდენტად ჰყავთ ჰომოსექსუალი და ამით ღმერთი განარისხეს. მსგავსი შინაარსის გზავნილი “აგვისტოს ომზეც” არსებობს.
მიტროპოლიტ იობის კურთხევით გამოცემულ ჟურნალ “ქვაკუთხედში”ეწერა, რომ 2008 წლის ომი ჩვენი სასჯელი იყო, თითქოს უფალს არ უნდოდა საქართველოს დასავლეთთან დაახლოება, მაგრამ რუსეთის მფარველობაში შესვლას დალოცავდა. 2014 წელს “ასავალ-დასავალთან” ინტერვიუში მროველ-ურბნელმა მიტროპოლიტმა იობ აქიაშვილმა თქვა:
“რუსეთი არასოდეს გვექცეოდა როგორც ერთმორწმუნე ერს და უამრავი ზიანი მოგვაყენა, არც თავად იქცევა სამაგალითო მართლმადიდებელივით, მაგრამ ჩემი დაცემული მართლმადიდებლობა მირჩევნია წარმართსა და ურწმუნო ამერიკელს და სულით მკვდარ ევროპელს!”
ევროპას და ამერიკას რომ ყველაფერ წმინდის და ეროვნულის მოსპობა აქვს განზრახული, ქადაგებენ მოლდოველი მღვდლებიც. ისინი დასავლეთს ოფიციალურ განცხადებებშიც “აშავებენ”, მაგალითად, დასცინიან იქაურ განათლების სისტემას.
“ქვეყნის მმართველები აირჩია უმრავლესობამ და არა უმცირესობამ. ამ უმრავლესობას, არ უსწავლია დასავლეთის უნივერსიტეტებში, მაგრამ მადლობა ღმერთს, ჯერ კიდევ იციან ‘მარცვლეულისა და სარეველას’ გარჩევა ერთმანეთისგან,”- ვკითხულობთ მოლდოვის საპატრიარქოს 2023 წლის ოფიციალურ განცხადებაში, რომლითაც გამოეხმაურნენ ადამიანის უფლებათა ევროპული სასამართლოს გადაწყვეტილებას ლგბტ წყვილების დაცვის შესახებ.
2014 წელს კი მოლდოვის სინოდი წერდა: “ევროპა უკვე გვიჩვენებს ღმერთის გარეშე არსებობის მაგალითს. დასავლეთი უგულებელყოფს მის მცნებებსა და აკრძალვებს. იქ დაჟინებით ვრცელდება იდეა, რომლის მიხედვითაც ადამიანმა თავისი ნებით უნდა იცხოვროს და არა ღვთის კანონებით.”
მოლდოვის მართლმადიდებლური ეკლესიისგან რუსეთთან დაძმობილება ნამდვილად არ გვიკვირს, იმ ფონზე, რომ მათი პატრიარქი უკრაინაში ომის დაწყების შემდეგაც პუტინის ჯანმრთელობაზე ლოცულობს. შარშან მოლდოვის პატრიარქმა ვლადიმერმა რუსეთის პატრიარქ კირილისგან სპეციალური ჯილდო დაიმსახურა, ქრისტიანული ტრადიციების დაცვისთვის.
2018 წელს კი კარტარიანს პუტინმა მეგობრობის ორდერი გადასცა, რუსეთის კულტურული და სულიერი მემკვიდრეობის შენარჩუნებისთვის.
საქართველოს მსგავსად, რუსეთიდან წამოსული ანტი-დასავლური გზავნილების გადამღერებას არ ერიდებიან არც მაღალი იერარქები. მოლდოვის მეორე უდიდესი ქალაქის, ბალტის მღვდელმთავარმა მარჩელ მიჰაესმა 2016 წელს თქვა, რომ ევროკავშირი ფინანსური მხარდაჭერის სანაცვლოდ ითხოვს ქრისტიანულ ღირებულებებზე უარის თქმას. ეპისკოპოსი მრევლსაც მოუწოდებდა, ღვთის გზაზე დარჩითო, რაშიც ევროპისგან შორს დგომა იგულისხმებოდა.
იმავეს ამბობდა მეუფე იობი აქიაშვილიც 2020 წლის აპრილში: “სავალუტო ფონდი საქართველოს 3,5 მილიარდი დოლარით ეხმარება, ეხმარება ასევე ქვეყანას ევროკავშირი. რის ხარჯზე, ყველაფერი ნათელია. ებრძვიან ეკლესიას.”
მოლდოველი და ქართველი მიტროპოლიტების ნაამბობი ზოგჯერ ერთი ერთში ემთხვევა როგორც რუსეთის პატრიარქის, ისე პუტინის სიტყვათწყობას. კირილის ქადაგებები ხშირად მიძღვნილია იმას, რომ გარყვნილი დასავლეთი ადამიანების სულების დაპატრონებას და ქრისტიანობის განადგურებას ცდილობს, ემტერება რუსულ კულტურასა და ეროვნულ ტრადიციებსაც.
„დასავლეთი თესავს გარყვნილებას, ცხოვრების წესად აქცევს პედოფილიას, ანგრევს ღირებულებებს… მოუწოდებს მღვდლებს დალოცონ ერთსქესიანთა ქორწინება… დასავლეთი გვთავაზობს გენდერულად ნეიტრალური ღმერთის იდეას,“ – ეს განცხადება ვლადიმერ პუტინმა 2023 წლის 21 თებერვალს გააკეთა.
ჰიბრიდული ომის მკვლევარ დავით ძიძიშვილის თქმით, რუსული საინფორმაციო ომის მისია მთელ პოსტსაბჭოთა სივრცეში არის, რომ რუსეთის სიცუდეზეც ილაპარაკოს, მაგრამ დასავლეთისგან შექმნას ცუდზე უარესი. საბოლოოდ კი ხალხს ორ ბოროტებას შორის უფრო პატარა აარჩევინოს, ან ბოროტებისგან იზოლაციაში ყოფნა შესთავაზოს, რაც ამ დროში მაინც რუსეთთან ყოფნას ნიშნავს.
ქართველი სასულიერო პირებიც ამ გზას მიყვებიან, კი იციან რუსეთის ბნელი მხარეები, მაგრამ ქართული ანდაზისა არ იყოს, მაინც შეჩვეული ჭირი ურჩევნიათ დასავლეთს გაურბიან.
“ძალიან იშვიათად, რომ სასულიერო პირი პირდაპირ ამბობდეს რუსეთი მინდაო. გეუბნებიან, რუსეთშიც ხომ ცოდვა ხდება, ეს პუტინი ნამდვილი სატანაა კაცო… დალაგებული აქვთ ნარატივი ასე – პუტინი რომ სატანაა ვიცით ყველამ და დასავლეთი რას გვიკეთებს? გვეუბნება ამ სატანას ეომეთო და ეგ გინდათ? რუსეთი მათთვის ნაცადი სიბოროტეა, მარტივად რომ ვთქვა და დასავლეთს უყურებენ როგორც შეფარულ ბოროტებას. რაც არ იციან, იმის უფრო მეტად ეშინიათ,”- ამბობს დავით ძიძიშვილი.
დეკანოზი ზაზა თევზაძე გვიხსნის, რომ დასავლური სამყარო მშვენივრად ეთავსება მართლმადიდებლობას, რუსეთს უბრალოდ მისი “გაშავება” აწყობს. უნდა ითქვას, ეს სასულიერო პირი არის იშვიათი გამონაკლისი, მის კოლეგებში დამკვიდრებულ აზრს რომ არად აგდებს ხოლმე და დინების საწინააღმდეგოდ მოქმედებს.
“რეალურად მთელი დასავლური სამყარო რაღაცებით სწორედ მართლმადიდებლურ ნორმატივებში ჯდება – სამების რწმენა, იესოს ორბუნებრიობის რწმენა, ეკლესიის რწმენა… მაგრამ რუსეთის ცდილობს მოახდინოს დემონიზაცია, რო აი ესენი ვინ არიან, ამათ უნდათ მსოფლიოს გარყვნა, არეულობა, ლგბტ თემები, ჰომოსექსუალიზმი. უნდათ ევროკავშირი და ამერიკა დახატონ ამ ყველაფრის სათავედ,” – გვითხრა დეკანოზმა.
ვცადეთ დაკავშირება სტატიაში ნახსენებ სამ სინოდის წევრთან, რომლებიც დასავლეთის წინააღმდეგ ყველაზე ხშირად გამოდიან. ესენია იოანე გამრეკელი, სპირიდონ აბულაძე და სტეფანე კალაიჯიშვილი. თუმცა, კონტაქტზე არც ერთი მათგანი გამოვიდა.
რუსეთი – მცველი გარყვნილების გზაზე
2019 წელს რუსმა იდეოლოგმა ალექსანდრე დუგინმა შექმნა ვიზუალიზაცია, თითქოს რუსეთი ქოლგის სახით იცავს მლოცველებს, რომელთაც თავზე აცვივათ ევროკავშირის, ნატო-ს და აშშ-სგან დაშენილი ბომბები. ეს ფოტო სოციალურ ქსელებში ხელახლა აიტაცეს უკრაინაში მიმდინარე ომის პარალელურად. მას რუსეთის საელჩოებიც აზიარებდნენ.
რუსეთის მეგობრად, მხსნელად და მცველად წარმოჩენისთვის ძალისხმევას არ აკლებს საქართველოს და მოლდოვის რამდენიმე სასულიერო პირიც.
“ჩემთვის რუსეთი ქრისტიანული ფასეულობების მცველია,”- ამ სიტყვებს ბალტის ეპისკოპოსი მიჩაელი ამბობდა.
ამავე აზრზეა ქუთათელ-გაენათელი მიტროპოლიტი იოანე გამრეკელი. 2014 წელს ჟურნალ “საუნჯეში” გამოქვეყნებულ წერილში ის ამბობდა, რომ რუსებს უნდა ვუმადლოდეთ ქართულ ტაძრებში კულტურული მემკვიდრეობის შენარჩუნებას. რუსი ეგზარქოსები რომ ისტორიულ ფრესკებს ათეთრებდნენ და ანადგურებდნენ, ამასაც კი მოუძებნა ახსნა – მხოლოდ იმ ტაძრების კედლები გადაღებეს, რომელიც რუსეთის მეფის გასავლელ გზაზე მდებარეობდა, მხატვრობის ფრაგმენტები იყო დარჩენილი, ამიტომ რესტავრაციის ნაცვლად შეათეთრეს და ხატები დაკიდესო.
2013 წელს სხალთის მთავარეპისკოპოს სპირიდონ აბულაძე ამბობდა, რომ რუსეთის ბატონობის ქვეშ ყოფნაც ასატანია, რადგან ვერ გაგვრყვნისო: “თუ მაინცდამაინც მონობა გინდათ, ისევ თქვენგან ნაგინები ე.წ. „უკულტურო” რუსეთი გერჩიოს ბატონად, რადგანაც ის ზნეობრივად ვერ გაგრყვნის. ფიზიკური მონობა გერჩიოს ზნეობრივ მონობა-გათახსირებას.”
სპირიდონ აბულაძეს რუსეთის მიმართ კეთილგანწყობა არც მომდევნო წლებში განელებია.
“ოკუპანტი… ოკუპანტი… ასეთი ამოკვიატება ქვეყნის, ისტერიული და ვაკხანალიური გინება რუსეთისკენ, მიმართულია პირდაპირ მართლმადიდებლობის დანგრევისკენ. ჩვენ ღვთისმშობლის წილხვედრი ვართ, რუსეთს ჰქვია ღვთისმშობლის სახლი და არ შეიძლება ერთმანეთთან ცუდად ვიყოთ, ერთმანეთს უნდა მივეხმაროთ,”- ამბობდა სხალთელი მთავარეპისკოპოსი სპირიდონი 2019 წლის ივლისში.
“თუ გინდა ჩემთან, ჰომოსექსუალისტი უნდა იყოო… ფუი ეშმაკს, რა ჯანდაბად მინდა,”- ამბობდა მეუფე სპირიდონი ევროკავშირზე, 2022 წლის ივნისში.
ეს განცხადებები აერთიანებს და ეხმიანება ყველა იმ ამბავს, რაც საქართველოში შეთხზეს რუსეთის ერთმორწმუნეობაზე. “ნეტგაზეთის” სტატიაში ვკითხულობთ, რომ გავრცელებულია მითი, თითქოს ერთმორწმუნე რუსეთმა დაგვიცვა მტრის შემოსევებისგან და შეგვინარჩუნა რწმენა, თითქოს რუსეთი არ წარმოადგენს საფრთხეს ქართული მართლმადიდებლობისთვის და პირიქით, პატივს სცემს რელიგიურ ძეგლებს.
არადა, სწორედ ეს რუსეთი და მისი ეკლესიაა, ვინც ოკუპირებულ ტერიტორიებზე მოქცეულ ტაძრებს რუსული გუმბათი დაადგა. ეკლესია წინ არ აღუდგა 2008 წლის ომს, 2022 წელს კი დალოცა უკრაინისკენ საომრად დაძრული რუსული არმია.
რუსეთს დასავლურ მანკიერებებთან მებრძოლად წარმოაჩენს თავად ვლადიმერ პუტინიც. “არსებობს მეორე დასავლეთი – აგრესიული, კოსმოპოლიტური, ნეოკოლონიური, ნეოლიბერალური იდეების დასაცავად. ამ დასავლეთს რა თქმა უნდა რუსეთი არასოდეს შეეგუება,”- თქვა პრეზიდენტმა 2022 წლის აგვისტოში.
ღვთისმეტყველი ზვიად ცაბაძე ფიქრობს, რომ საპატრიარქოში მძლავრი “რუსული ფრთის” საფუძველი არის ამ სასულიერო პირების წარსული და პირადი ბმები ჩრდილოელ მეზობელთან. მისი თქმით, იმის გამო, რომ სინოდის წევრების ნაწილმა განათლება რუსეთში მიიღო, იქაური სამყაროს მიმღებლობაც აქვთ, იმახსოვრებენ და ავრცელებენ იმას, რაც იქ ისწავლეს, რა იდეოლოგიაზეც გაიზარდნენ. ამ ფონზე კი რუსეთისთვის საიმედო დასაყრდენად იქცნენ.
“რუსეთს მიაჩნია, რომ ის არის მოწინავე მებრძოლი დასავლურ, ასე ვთქვათ, გარყვნილებასთან, ბიწიერებასთან და ამ საქმეში სჭირდება მეგობრები, დამხმარეები…საზოგადოებაზე ისეთ მძლავრ გავლენას ვერავინ მოახდენს, როგორც ეკლესია და ეს იცის რუსეთმაც. ერთ-ერთი ასეთი დამხმარეა საქართველოს საპატრიარქო და გარკვეული იერარქები. ასეთი მოცემულობა გვაქვს, რუსეთი მართავს წმინდა სინოდს და მღვდელმთავრებს, ყველას არა, მაგრამ იმ ნაწილს, რომელსაც რაიმე ეთქმის სინოდში და მათი მეშვეობით უკვე იმართება საქართველოს ეკლესია,”- გვითხრა ღვთისმეტყველმა ზვიად ცაბაძემ.
საელჩოები თავის ჭკუაზე გვათამაშებენ
მოლდოველი და ქართველი სასულიერო პირები მრევლს შთააგონებენ, რომ ჩვენს ქვეყნებში ყველა გადაწყვეტილებას აშშ-ს საელჩო იღებს, ელჩები კი თავს ზედმეტის უფლებას აძლევენ და უხეშად ერევიან პოლიტიკურ დღის წესრიგში. საქართველოს საპატრიარქო ამზე ოფიციალურ განცხადებებშიც ალაპარაკდა.
“ჩვენი ეკლესიისთვის და ჩვენი მოქალაქეებისთვის შემაშფოთებელი და მიუღებელია გარკვეულ საელჩოთა და ევროპარლამენტარების ნაწილის მკვეთრი ჩარევა ჩვენს საზოგადოებრივ და სულიერ ცხოვრებაში და ვთვლით, რომ ეს მათი უფლებამოსილების გადამეტებაა,”- ნათქვამია 2021 წლის 29 ივნისის განცხადებაში.
საპატრიარქოს პოზიციას ფეხს უწყობენ სინოდის წევრები. მეუფე სტეფანე ფიქრობს, რომ საქართველოს მთავრობა ერიდება საელჩოების კრიტიკას, ამიტომ მათი შეჩერება ეკლესიის ვალია. მთავარეპისკოპოსი სპირიდონ აბულაძე კი დიპლომატებს მოძალადეებად მოიხსენიებს და 5 ივლისს განვითარებულ მოვლენებს მათ წაქეზებულს უწოდებს.
სპირიდონ აბულაძე დასავლეთის ელჩების უარყოფით გავლენებზე წარსულშიც საუბრობდა. 2021 წლის სექტემბერში ანონიმური წყაროების მიერ გამოქვეყნდა სუს-დან გაჟონილი ჩანაწერები. ამ დოკუმენტებით ირკვევა, რომ მეუფე სპირიდონი 2019 წლის ივნისში პრორუსულ პარტია “პატრიოტთა ალიანსთან “ და რუსული “პრიმაკოვის ფონდის” ხელმძღვანელთან ერთად ამერიკისა და ბრიტანეთის საელჩოებთან აქციებს აორგანიზებდა.
საპატრიარქოს მმართველი რგოლის ხედვები აირეკლება ცალკეული მღვდლებისა და დეკანოზების საუბრებშიც. ისინი სხვადასხვა პრორუსული მედიის ეთერებში ამერიკის და ევროკავშირის საელჩოებს “გარყვნილების ბუდესაც” უწოდებენ და ამბობენ, ჩვენს ქვეყანას შხამავენო.
2022 წლის ივლისში საპატრიარქოს პრესსპიკერი ანდრია ჯაღმაიძეც ამბობდა, ევროკავშირმა არ შეასრულა დანაპირები, რომ ტრადიციულ ფასეულობებს არ შეეხებოდაო:
“სამწუხაროდ, დამოკიდებულება შეიცვალა და ბოლო დროს ევროპის ქვეყნების ელჩებმა სხვა პოზიცია დააფიქსირეს და ეს ლგბტ უფლებებები და ეს ე.წ მსვლელობები და მარშები აუცილებელ პირობად გამოაცხადეს.”
ჩვენმა კვლევამ აჩვენა, რომ კრემლის პროპაგანდისტების და ქართველი სასულიერო პირების თავში ზოგჯერ ერთი და იგივე აზრები ტრიალებს.
კრემლისტურმა გამოცემა “ევრაზია დეილიმ” 5 ივლისის ძალადობრივ მოვლენებს მეორე დღესვე სტატია მიუძღვნა და დაწერა, საქართველოში “ადამიანის უფლებების დაცვის” უკან კელი დეგნანი დგასო.
იგივე შინაარსის იყო რუს პროპაგანდისტ ოლგა სკაბაევას განცხადებაც. მან 2021 წლის 26 ივლისს რუსეთის პირველ არხის ეთერში თქვა, ამერიკა ცდილობს გაავრცელოს შემწყნარებლობის და ლიბერალიზმის იდეები, მაგრამ ქართველ ხალხში საბჭოთა კავშირის ნოსტალგია მაინც არსებობსო.
თუ გსურთ, რომ “აი, ფაქტმა” გააგრძელოს ეკლესიაში პროპაგანდის კვლევა, გახდით ჩვენი სპონსორი
რატომ უპირისპირდება საპატრიარქო დასავლეთს?
თეოლოგები და ჰიბრიდული ომის მკვლევრები გვეუბნებიან, რომ ანტი-დასავლური პროპაგანდის ფერხულში ჩაბმულია საქართველოს საპატრიარქოში არსებული ორი ჯგუფი. ერთს შესაძლოა ფინანსური ინტერესი ჰქონდეს და ამიტომ რუსეთის მითითებებს ბეჯითად ასრულებენ, მეორე ჯგუფში კი გულწრფელად სწამთ, რომ სარწმუნოების დაცვა უცხოური გავლენებისგან მათი მისიაა.
დავით ძიძიშვილი გვიხსნის, რომ რუსული პროპაგანდა ასე მუშაობს – მათზე მიმაგრებულ “აგენტებს” უკვეთავენ, რა და როგორ თქვან დასავლეთის საზიანოდ. ისინი მეორე ჯგუფს, რომელთაც თავისთავად სჯერათ დასავლური სამყაროს მანკიერებების, აწვდიან ფაქტებს, ერთმანეთში არეულ სიმართლესა და ტყუილს. მეორე ჯგუფი მოსმენილს ეჭვის შეუტანლად იჯერებს და საბოლოოდ ეს აზრები მრევლამდე მიაქვთ.
დეკანოზი ზაზა თევზაძეც ასე ფიქრობს, რომ არსებობს დასავლეთის წინააღმდეგ ამხედრებული სასულიერო პირების სხვადასხვა კატეგორია. ერთს რუსეთის ერთგულება კონკრეტული სარგებლით უფასდება, მეორეს კი ალალად სწამს თავისი სიტყვების. დეკანოზი ამას უკვე გაუნათლებლობას აბრალებს. არსებობს მესამე შემთხვევაც, როცა ადამიანებს ეჭვი ებადებათ, მაგრამ გამბედაობა არ ჰყოფნით, კითხვები დასვან:
“ზოგიერთს გულწრფელად სჯერა ეს ყველაფერი, რადგან რუსეთში მუშაობს ტვინის გამორეცხვის მექანიზმი… რომ დააჯერებ ადამიანს და ამ სულისკვეთებით დამუხტავ, ის უკვე გულწრფელია. მერე რა, რომ გულწრფელია? ის თვითონ არი დეგრადირებული, სამყაროს ხედავს ამოტრიალებულად. ისინი არიან გაუნათლებლები, უწიგნურები და ვერ ასხვავებენ თეთრს და შავს.“
ღვთისმეტყველი ზვიად ცაბაძე მიიჩნევს, რომ სასულიერო პირები დასავლეთისგან “საფრთხობელას” ქმნიან ერთი მიზნით – განამტკიცონ ძალაუფლება და შეინარჩუნონ ავტორიტეტი.
“ალბათ, არიან სასულიერო პირები, რომლებსაც გულწრფელად სჯერათ რომ დასავლეთზე დემონი მეფობს და იქ არავითარი სიკეთი არ არსებობს. მაგრამ იმ იერარქებს, ამას წლებია ამბიონებიდან რომ ქადაგებენ, რა თქმა უნდა, ეს სჭირდებათ ქონებრივად, მატერიალურად, მომგებიანია და გავლენას ინარჩუნებს მრევლსა და საზოგადოებაზე. როდესაც შიშში ცხოვრობს საზოგადოების ნაწილი, მათი მართვა გაცილებით მარტივია, მათთვის მთავარი ღირებულება თავისუფლება აღარ არის.”
საპატრიარქოს პოზიცია
გვაინტერესებდა, როგორ რეაგირებს საპატრიარქო იმაზე, რომ სინოდის წევრები საქართველოს სტრატეგიული პარტნიორების და დიპლომატიური კორპუსის მიმართ შეურაცხმყოფელ განცხადებებს ავრცელებენ. პრესსპიკერს ვკითხეთ, თუ მიუციათ შენიშვნა რომელიმე მღვდელმთავრისთვის იმის გამო, რომ ანტი-დასავლურ გზავნილებს აჟღერებენ, ან რას ფიქრობენ იმაზე, რომ სინოდის წევრებს და კრემლის პროპაგანდისტებს ერთნაირი განცხადებები აქვთ ხოლმე.
ანდრია ჯაღმაიძემ კონკრეტული სასულიერო პირების ციტატები გაგვაგზავნინა და ასეთი პირობა წამოგვიყენა, თუ ჩემ ნათქვამს სრულად გამოაქვეყნებთ და არა ამონარიდებად, მხოლოდ მაშინ მოგცემთ ინტერვიუსო. საბოლოოდ, საპატრიარქოს პრესსპიკერმა გამოგვიგზავნა 300-სიტყვიანი პასუხი, რომელსაც უცვლელად გთავაზობთ.
“თქვენი კითხვების პათოსი პრობლემის სათავედ ეკლესიას წარმოაჩენს. პრობლემა მართლაც არსებობს, თუმცა ის რაც ზოგ შემთხვევაში ქადაგებებში ყურს ჭრის, შესაძლოა მივიჩნიოთ შედეგად და არა მიზეზად. ამის შესახებ ჩვენ საჯაროდაც და კულუარებშიც არაერთხელ დავსვით საკითხი, მათ შორის ჩვენი ქვეყნის სტრატეგიულ პარტნიორებთან. მაგალითად, 2019 წელს ზაფხულში ბათუმში (11.07.19) გამართულ საერთაშორისო კონფერენციაზე, ამავე წლის სექტემბერში ბრიუსელში, – ევროპარლამენტარებთან და ოქტომბერში აშშ-ს სახელმწიფო დეპარტამენტში, საპატრიარქოს დელეგაციის ვიზიტისას გამართულ შეხვედრებზე, ჩვენ ვისაუბრეთ ამ პრობლემაზე. აი ფაქტი.
ამ ფორუმზე ჩვენ განვაცხადეთ, რომ ის ვულგარული და აგრესიული პოლიტიკა, რომელსაც ქართული ტრადიციების გადალახვისთვის ეწევიან დასავლეთთან ასოცირებული არასამთავრობო ორგანიზაციების ნაწილი, ზოგიერთი პოლიტიკოსი და ტელევიზია, და მათ მიერ მხარდაჭერილი ლგბტ პროპაგანდა, რუსეთის რბილი ძალისთვის ანტიდასავლური განწყობების გასაღვივებლად ქმნის ნოყიერ ნიადაგს. ჩვენ ამ საკითხის პრობლემატიკაზე არაორაზროვნად მივანიშნებდით, ველოდებოდით დაინტერესებას და კომუნიკაციის გაგრძელებას, სამწუხაროდ, მოხდა პირიქით, ჩვენს მიერ მიწოდებული მოსაზრებების სრული იგნორი, ხოლო ლგბტ პროპაგანდა, ოჯახზე და ეკლესიაზე შეტევები წახალისდა.
ზოგ შემთხვევაში ქადაგებაში პოლიტიკური თემის გამოტანა მომხდარა, და რადიკალური სახითაც, ეს არ არის მისასალმებელი, თუმცა ეს იშვიათი შემთხვევებია საერთო წილიდან და არ უნდა მივიჩნიოთ საპატრიარქოს პოზიციად, საპატრიარქოს პოზიცია მის ოფიციალურ განცხადებებში აისახება. არის შემთხვევები, როდესაც შენიშვნაც მიუღია სასულიერო პირს მსგავსი გამონათქვამების გამო, თუმცა უნდა ისიც ვთქვათ, რომ საპატრიარქო ვერ დააწესებს ცენზურას, როგორც ამას უკრაინასთან ომის პერიოდში რუსეთში ვხედავთ.
ამ და სხვა შეხვედრებზე ჩვენ ღიად ვსაუბრობდით და წინასწარ გავაფრთხილეთ, რომ საზოგადოების მნიშვნელოვან ნაწილში, მსგავსი დამოკიდებულება გამოიწვევდა რუსეთისთვის ხელსაყრელ განწყობებს. ხსენებული ჯგუფები კი აგრძელებდნენ ეკლესიის ქვეყნის განვითარების შემაფერხებელ ფაქტორად წარმოჩენას.
ახლა კი გვიკავშირდებით თქვენ – „აი ფაქტი“ და ინტერესდებით ამის აღმოსაფხვრელად ეკლესია რას აკეთებს.
კიდევ ერთხელ ხაზს გავუსვამთ, ქადაგებაში შეიძლება ისმის ის პოლიტიკური განწყობები, რაც გაღვივებულია საზოგადოებაში და არა პირიქით. საუკეთესო საშუალება რომ ანტიდასავლური განწყობების შექმნას თავი ავარიდოთ იქნებოდა, მიუკერძოებელი და რაციონალური დამოკიდებულება იმ ტრადიციებისადმი, რასაც მოსახლეობა პატივს სცემს და ლგბტ პროპაგანდაზე უარის თქმა. ქართულმა ეკლესიამ, არაერთხელ გამოხატა და გამოხატავს მზადყოფნას, მხარი დაუჭიროს ჩვენი ხალხის არჩევანს და ჩვენი ქვეყნის საკეთილდღეოდ ითანამშრომლოს საქართველოს სტრატეგიულ პარტნიორებთან,”- გვითხრა საქართველოს საპატრიარქოს პრესსპიკერმა ანდრია ჯაღმაიძემ.
პროექტი მომზადებულია journalismfund.eu-ს ფინანსური მხარდაჭერით. მასალაში გამოთქმული მოსაზრებები, შეიძლება, არ ასახავდეს დონორის პოზიციას.
იხილეთ ასევე:
ქადაგება რუსეთის საამებლად – ნაწილი 1
ქადაგება რუსეთის საამებლად – ნაწილი 2
ქადაგება რუსეთის საამებლად – ნაწილი 3
მასალაში გამოყენებული წყაროების სანახავად მიჰყევით ბმულს
