ავტორი: ანა რობაქიძე
ფოთის სანაპიროზე, მიქაბერიძის ქუჩაზე, სამი წელია ერთი შენობა უფუნქციოდ დგას. აქ ახლა, წესით, “პენსიონერთა კლუბი” უნდა მოქმედებდეს. მის ასაშენებლად და გასარემონტებლად 112,600 ლარი დაიხარჯა, მაგრამ შენობა დღემდე უფუნქციოა და თანდათან ისიც ზიანდება, რაც ამ თანხით გაკეთდა.
ამ შენობის აშენება მერიას ფოთელი პენსიონერების ორგანიზაცია “ბერბერამ” სთხოვა. პენსიონერები ფიქრობდნენ, იქ შეძლებდნენ შეკრებას და სხვადასხვა ღონისძიების ჩატარებას.
პენსიონერების თავშეყრის ადგილად დღემდე თუნუქით შეკრული კონსტრუქცია რჩება, რომელიც “პენსიონერთა კლუბის” ვერგახსნილი შენობიდან 15 მეტრში დგას. სწორედ აქ იკრიბებიან “ბერბერას” წევრები სასაუბროდ და ნარდის სათამაშოდ. ფოთელი პენსიონერები შვიდი წლის განმავლობაში სთხოვდნენ მერიას, მათთვის განკუთვნილი სივრცის მოწყობას და დაპირებებსაც იღებდნენ.
საბოლოოდ მერიამ “საპენსიო კლუბის” შენობის პროექტი 2020 წელს წამოიწყო. 2018–2019 წლებში გამოცხადებული ტენდერის საფუძველზე ჯერ საპროექტო ნახაზი მომზადდა. ამ შემთხვევაში, შემსყიდველი არა ფოთის, არამედ ხობის მერია იყო.
სწორედ მან დაუკვეთა შპს “საუკის” სენაკის, ფოთისა და ხობის ინფრასტრუქტურული საპროექტო-სახარჯთაღრიცხვო დოკუმენტების შედგენა. რა ღირდა ცალკე “პენსიონერთა კლუბის” 3d ნახაზი, ამაზე უწყებიდან გამოთხოვილ საჯარო ინფორმაციაში არ უპასუხიათ. მიზეზად ასახელებენ შესყიდვის ერთკომპონენტიან დოკუმენტაციას, რომელშიც ცალკე შენობის ფასი განსაზღვრული არ არის.
2020 წელს კი ფოთის მერიამ ხელშეკრულება შპს “ზმ ჯგუფს” გაუფორმა. კომპანიას, კუნძულის სანაპირო ზოლის მოწყობასთან ერთად, “პენსიონერთა კლუბის” შენობის გარემონტება ხუთ თვეში დაევალა.
კომპანიამ შენობა კი ააშენა, მაგრამ ის იმ მიზნებისთვის, რაც პენსიონერებს ჰქონდა, გამოუსადეგარი იყო: არ ჰქონდა შესაბამისი ავეჯი და მცირე ტექნიკა. “ბერბერას” წევრებმა გასაღები მერიას დაუბრუნეს და უთხრეს, რომ შენობას მაშინ ჩაიბარებდნენ, როდესაც შეპირებული ინვენტარი ექნებოდათ.
“მოლაპარაკებულები ვიყავით, როდესაც აშენდებოდა, მერიის დახმარებით კეთილმოგვიწყობდნენ… ჩვენ არაფერი არ გვაქვს, არც ფული, არც სახსრები, არაფერი… რასაც შეგვპირდნენ ისინი, არ შეგვისრულეს და ფეხზე დამდგარი ხომ არ ვიქნებოდით, კაფე-ბარი ხომ არ არის?” – გვითხრა ვიტალი კობიძემ, “ბერბერას” ხელმძღვანელმა. მას ჩვენ ფოთში, უფუნქციო შენობასთან შევხვდით.
კობიძემ ისიც მოგვიყვა, რომ უსახსრობის გამო პენსიონერებმა სკამების შეძენა ვერ შეძლეს, ვერ ახერხებდნენ ვერც სტუმრების მიღებას და ვერც შეხვედრების ამ სივრცეში ჩატარებას. დრო გავიდა. ვერც დაპირებული ავეჯი მიიღეს და უმეთვალყურეოდ დარჩენილი შენობაც შეილახა. საპირფარეშოები კი თავიდან მოსაწყობი გახდა.
ერთსართულიანი ნაგებობა, რომელშიც 112 ათასი ლარზე მეტი დაიხარჯა, უკვე დაზიანებულია. ფასადი თეთრი ვიტრაჟებით არის გაწყობილი და მინები ზოგიერთ ადგილზე ჩამსხვრეულია. ფანჯრის ორი განყოფილება კი გატეხილია. ნაგებობას მისაღები, საშხაპე და სამზარეულო ოთახები აქვს, მათში შესასვლელი კარი დაკეტილია.
საპირფარეშო, რომელიც გარეთ დგას ორგანყოფილებიანია და ყველაზე მეტადაა დაზიანებული. იატაკი სიდამპლეში გადასული ფოთლებით იყო მოფენილი. იქვე ეყარა ბოთლები, კედლის კუთხეში კი სველი ტანსაცმელი იყო დაყრილი. საპირფარეშოს ერთ-ერთ განყოფილებას კარი ჰქონდა ჩამოხსნილი, მეორეს კი საკეტიც არ ჰქონდა. დაზიანებული იყო წყლის პლასტმასის ავზიც. პირსაბანზე დამაგრებული ონკანი ისეა დაჟანგული, რომ არ მუშაობს.
“ბერბერას” წევრები მერიას ხან გაზეთიდან მიმართავენ, ხანაც კი წერილით ახსენებენ, რომ შენობამ ფუნქციონირება უნდა დაიწყოს.
“პენსიონერთა კლუბი” გოჩა კურდღელიას მერობის დროს აშენდა. უფუნქციოდ მდგარი შენობის ბედით არც ორი წლის წინ არჩეული მერი, ბექა ვაჭარაძე დაინტერესებულა.
ქალაქის მერთან კომუნიკაცია, ფაქტობრივად, ჩვენთვისაც შეუძლებელი აღმოჩნდა. ჩვენ მერთან შეხვედრა გვინდოდა. საზოგადოებასთან ურთიერთობის სამსახურის წარმომადგენელმა, ანჟელა კილასონიამ გვითხრა, რომ მერი ორი დღით თბილისში იყო მიწვეული, ღონისძიებაზე. მერი თბილისში იყო ორი კვირის შემდეგაც. მასთან ვერც სატელეფონო ინტერვიუს ჩაწერა შევძელით. ვცდილობდით მერის მოადგილესთან დაკავშირებასაც, თუმცა უშედეგოდ.
ბოლოს საზოგადოებასთან ურთიერთობის სამსახურის წარმომადგენლისგან, გამომძიებელ ჟურნალისტთა გაერთიანება “აი, ფაქტმა” ეს პასუხი მიიღო: “კითხვები, რაც გქონდათ მოწერილი, კი გამოვგზავნეთ პასუხები. კომენტარს არ ვაკეთებთ.”
ამჟამად “პენსიონერთა კლუბის” შენობა ა(ა)იპ “სპორტისა და ტურიზმის ცენტრის” დაქვემდებარებაშია. ორგანიზაციის დირექტორმა ბექა გუგუშვილმა თქვა, რომ ინვენტარის გარკვეული ნაწილი მიტანილია ადგილზე, ნაწილით კი თანდათან მომარაგდება. ხოლო პირველი ივლისიდან შენობა დაიწყებს ფუნქციონირებას. კითხვაზე, რა ბედი ელის საპირფარეშოებს, რომელის ფაქტობრივად თავიდან არის გასაკეთებელი მიპასუხა, რომ გაიწმინდებდა და ისე გადაეცემა პენსიონერებს.
ჩვენ ჯემალ გერსამიას, “ბერბერას” კოორდინატორს 28 ივნისს ვესაუბრეთ. მან გვითხრა, რომ შენობის გახსნის შესახებ მერიას მათთვის ჯერ არაფერი უცნობებია.
სტატია შეიქმნა ევროკავშირის ფინანსური მხარდაჭერით, Askgov.ge-ის სასტიპენდიო პროგრამის ფარგლებში. Askgov.ge იცავს და აძლიერებს საჯარო ინფორმაციის ხელმისაწვდომობას საქართველოში.
მასალაში გამოყენებული წყაროები
