ავტორი: თამუნა ქიმაძე
ქუთაისის შუაგულში, აღმაშენებლის მოედანზე, მულტიფუნქციური ცენტრი 2022 წლიდან შენდება. აქ საგამოფენო სივრცე, ამფითეატრის ტიპის სცენა, ტერასა მოედნის ხედით და სახელოვნებო სივრცეები ორი წლის წინ უნდა მოეწყოთ, თუმცა სამუშაოები გაიწელა და დღემდე მიმდინარეობს. შეფერხების მიზეზი არასრულყოფილი პროექტია, რის გამოც მშენებელ კომპანიას ადგილზე “სიურპრიზები” დახვდა. შედეგად, ხელშეკრულების 9-ჯერ შეცვლა და საქმის გახანგრძლივება მოუწია.
დღემდე, მულტიფუნქციური სივრცის მშენებლობაში 4 მილიონ ლარამდეა დახარჯული და დამატებით, 1,5 მილიონი ლარის დახარჯვა იგეგმება. ამ სტატიაში მოკლედ მოგიყვებით, ვისი პასუხისმგებლობაა სამუშაოების შეფერხება და, ბოლოსდაბოლოს, როდის დასრულდება სამი წლის წინ დაწყებული საქმე.
„მალე დასრულდება ქუთაისისთვის ერთ-ერთი მნიშვნელოვანი შენობის კონსტრუქციული და არქიტექტურული ნაწილის მშენებლობა. სამუშაოების დასრულების შემდეგ, ქალაქში გვექნება კიდევ ერთი თანამედროვე სახელოვნებო სივრცე, რომელიც ახალ შტრიხს შემატებს ქუთაისის ცენტრალურ მოედანს და ამასთანავე, შენარჩუნებული ექნება ავთენტური იერსახე”, – ამბობდა ქუთაისის მერის მოვალეობის შემსრულებელი დავით ერემეიშვილი 2024 წლის აგვისტოში.

ნაგებობა, სადაც ახლა მულტიფუნქციური ცენტრი უნდა მოეწყოს, მე-19 საუკუნით თარიღდება. აქ ადრე ისტორიულ-ეთნოგრაფიული მუზეუმი იყო, 2013 წლიდან კი შენობა ცარიელია და უფუნქციოდ დგას.
2022 წელს მთავრობამ ამ შენობისთვის “ახალი სიცოცხლის” მინიჭება გადაწყვიტა და ამისთვის 5 მილიონი ლარი გამოყო, “საპილოტე რეგიონების” პროგრამიდან.
ხაზი უნდა გავუსვათ, რომ ეს პროგრამა ევროკავშირის ძალისხმევით შეიქმნა და მისი ბიუჯეტის 80 პროცენტზე მეტი ევროკავშირის მიზნობრივი დახმარებით ივსება.
“საპილოტე რეგიონების პროგრამა ევროკავშირის ექსპერტების ჩართულობით შემუშავდა და ზოგადი ხედვა ევროკავშირის რეგიონული განვითარების პოლიტიკის უახლეს მიდგომებს ეფუძნება. მოსალოდნელი შედეგები ითვალისწინებს სახელმწიფო სერვისებზე ხელმისაწვდომობისა და ხარისხის ამაღლებას, სიღარიბის შემცირებას და საბოლოოდ – თბილისსა და საპილოტე რეგიონებს შორის სოციალური და ეკონომიკური უთანაბრობების ეტაპობრივ აღმოფხვრას.
2022 წლის აპრილში ქუთაისის მერიამ სამუშაოების პროექტი მოამზადა, რომელშიც შპს “ნს სტუდიოს” 4 ათასი ლარი გადაუხადა. შემდეგ კი ამ პროექტის მიხედვით სამუშაოები დაუკვეთა შპს “ართვინ ჯორჯიას”.

2022 წლის აგვისტოდან მოყოლებული, კომპანია საქმეს რომ შეუდგა, ადგილზე რამდენიმე გაუთვალისწინებელი ფაქტორი აღმოაჩინა. ამიტომ, გზადაგზა, “ართვინ ჯორჯიას” მოთხოვნით, ხარჯთაღრიცხვა და სამუშაოების ვადა იცვლებოდა.
მაგალითად, პროექტით არ იყო ბოლომდე გარკვეული, როგორ უნდა მოეწყოთ საძირკვლის ჰიდროიზოლაცია, შუშის სახურავი, ლიფტის და კიბის უჯრედების კარი. ასევე, კითხვას აჩენდა, გამძლე იყო თუ არა ტერასის მოსაპირკეთებელი მასალა – გელათის ბუნებრივი კირქვა.
გარდა ამისა, პროექტით ისიც ვერ გათვალეს, რომ შენობის ფასადის ერთი კედელი მდგრადი არ იყო და საავტომობილო გზაზე ვიბრაციას ვერ უძლებდა. ეს “ართვინ ჯორჯიამ” ადგილზე მუშაობისას დაადგინა, მერიას შეატყობინა და საბოლოოდ, ამ კედლის დროებითი გამაგრება მოუწიათ. ბუნებრივია, ამ დაუგეგმავმა საქმემ დამატებითი დრო და ფინანსები წაიღო.
ეს ყველაფერი თავის დროზე, პროექტის ავტორსაც უნდა გაეთვალისწინებინა და მის დამკვეთ ქუთაისის მერიასაც. მათი უპასუხისმგებლობა იმაშიც გამოჩნდა, რომ მშენებელ კომპანიას გზადაგზა გაჩენილ კითხვებზე დროულად არ პასუხობდნენ.
“ვეცადეთ სამუშაოები შეგვესრულებინა ტემპის შეუჩერებლად, ხარისხიანად, არ დაგვიშურებია დროის თუ ადამიანური რესურსი, თუმცა აღვნიშნავთ, რომ ეს ყოველივე შეუძლებელია. დამკვეთის მხრიდან საპროექტო დოკუმენტაციისა და სამუშაოების შესასრულებლად საჭირო მასალის და მეთოდოლოგიის თაობაზე გადაწყვეტილების მიღების მიზნით რამოდენიმეჯერ წერილობით მოგმართეთ, თუმცა ოფიციალური წერილობითი პასუხი თქვენგან დღემდე არ მიგვიღია”, – წერია “ართვინ ჯორჯიას” მიერ მერიისთვის გაგზავნილ 2024 წლის 6 დეკემბრის წერილში.


შესყიდვის დოკუმენტების მიხედვით, მერია მშენებელ კომპანიას ერთი თვის შემდეგ გამოეხმაურა და დარედაქტირებული პროექტი გაუგზავნა. თუმცა, კომპანიისთვის დეტალები ისევ ბუნდოვანი იყო.
“…დანართის სახით მოწოდებული პროექტი არ არის სრულყოფილი და არ არის საკმარისი სამუშაოების გასაგრძელებლად. მოწოდებული დოკუმენტაცია არ წარმოადგენს სამუშაოთა გაგრძელების საფუძველს”, – წერდა “ართვინ ჯორჯია” ქუთაისის მერიას 2025 წლის 17 იანვარს.
აქედან ხუთ დღეში ქუთაისის მერიამ პროექტის ავტორს მკაცრად მიწერა, თქვენგან დღემდე ვერ მივიღეთ სრულყოფილი დოკუმენტები და თანამშრომლობას ვწყვეტთო: “…პროექტის ლოგიკურ დასასრულამდე მიყვანის მიზნით, გაცნობებთ, რომ ვწყვეტთ თქვენთან თანამშრომლობას და პროექტი გაგრძელდება თქვენი ჩართულობის გარეშე..”.
გამოდის, აღარ არსებობს პასუხისმგებელი პირი, რომელიც მშენებელ კომპანიას სამუშაოების დროს გაჩენილ კითხვებზე უპასუხებს და პროექტის ხარვეზებში გაარკვევს. ვერ ვიგებთ, აპირებს თუ არა მერია ახალი საპროექტო კომპანიის დაქირავებას.
მულტიფუნქციური ცენტრის მშენებლობას რომ თანმიმდევრულად და პასუხისმგებლობით არ მიუდგნენ, იმაშიც ჩანს, რომ ოფიციალურ დოკუმენტებში ამოკითხული და ადგილზე ნანახი რეალობა ერთმანეთს სრულიად აცდენილია.
დოკუმენტებით, “ართვინ ჯორჯიამ” არასრულყოფილი პროექტის გამო მუშაობა 17 იანვარს შეწყვიტა. თუმცა, 28 იანვარს ადგილზე რომ მივედით, მულტიფუნქციურ სივრცეში ზედამხედველი ინჟინერიც დაგვხვდა და მუშებიც მუშაობდნენ.

ინჟინერ გიორგი მაჭავარიანს თავის კაბინეტში ვესაუბრეთ. გვითხრა, რომ გეგმა-გრაფიკს მიყვებიან და მუშაობა არასდროს შეუწყვეტიათ.
“მაგას [პროექტის დოკუმენტებს] ველოდებით, ოღონდ ახლა მიმდინარეობს ინტერაქციულად. აქ, საინჟინრო დონეზე, მარტო წერილობით არ არის, აქ კიდევ სხვა ბევრი ტექნიკური დეტალი არსებობს, პროექტირების დონეზე რაღაცა წვრილმანები, სანათები, ელექტროობა, ვიზუალური ინტერიერის ნაწილები… მიმდინარეობს ახლა და ველოდებით მუშა რედაქციას. ახლა, უბრალოდ, 2 საათამდე შესვენება გვაქვს და იმიტომაა წასული ყველა, თორემ ჩვეულებრივად მიმდინარეობს გრძელდება სამუშაოები. ლუკას [საპროექტოს ხელმძღვანელი] წეღან ვესაუბრე, კვანძები უნდა გამომიგზავნოს….” რომ ვუთხარით, კი მაგრამ ოფიციალურად, სამუშაოები 17 იანვარს შეწყვიტა თქვენმა კომპანიამ-თქო, გვიპასუხა – “მაგდენი არ ვიცი… “
ასევე უცნაური იყო პროექტის ავტორის, “ns სტუდიოს” დირექტორის პასუხი. ლუკა ჩაგანავამ გვითხრა, ჩვენი დოკუმენტაცია არასრულყოფილი არ ყოფილა, ეტყობა, “ართვინ ჯორჯიას” არ აქვს ამ საქმეში სათანადო გამოცდილება და დროში რატო ვერ ეტევიან არ ვიციო. რაც შეეხება, მერიასთან თანამშრომლობის შეწყვეტას, ჩაგანავა ამაზე არ დარდობს და ამბობს, მაგათ წერილზე მეცინება, მე მაინც მივიყვან საქმეს ბოლომდე, ქვეყნის ინტერესი მამოძრავებსო. როგორც ჩანს, პროექტის ავტორი მშენებლებისთვის კონსულტაციის გაწევას კვლავ აპირებს, როგორც თვითონ ამბობს, “ქვეყნის ინტერესით”.
“ჩვენ რეაბილიტაციის პროექტი საჩუქრად გავუკეთეთ ქუთაისს, 4 000 ლარად, სინამდვილეში, დავხარჯეთ 150 000… მიზანი იყო, რომ გადაგვერჩინა ეს შენობა. დანგრევა უნდოდათ, ჩვენ ჩავატარეთ შესაბამისი ისტორიული კვლევა და დადგინდა, რომ მას მემორიალური ღირებულებები აქვს. [მერიის] წერილი ნანახი მაქვს, კი, გამეცინა უბრალოდ… ჩემს გარეშე ვერ გააკეთებენ მაგ ობიექტს, მაინც ყველაფერზე მე მირეკავენ და… თვითონ კომპანიით არ ვარ კმაყოფილი, ჩვენ ნაბიჯ-ნაბიჯ მივყვებოდით და ვუკორექტირებდით ნახაზებს. ეს მიდგომა, რომ პროექტს სანამ არ მოგვცემთ, ვაჩერებთ მშენებლობას, ჩემთვის მიუღებელია… ნუ, გადაწყვეტილება მიიღო ქუთაისმა და მიიღო, მიიღო… მე მაინც ვეცდები ყველანაირად, რომ პროექტი მაქსიმალურად წარმატებით განხორციელდეს. კიდევ დავხარჯავთ, თუ საჭირო იქნება, რომ მივიყვანოთ ბოლომდე, ესაა ჩემი მიდგომა, ზოგადად კომპანიის და ვინ როგორ აღიქვამს, ნაკლებად მაინტერესებს”, – გვითხრა ლუკა ჩაგანავამ.
საბოლოოდ, ისე გამოვიდა, რომ მულტიფუნქციური სივრცის დროულად დასრულებაზე პასუხისმგებელი ყველა მხარე თითს ერთმანეთისკენ იშვერს.

კიდევ ერთ კითხვის ნიშანს აჩენს ქუთაისის მერიის ახალი ტენდერი, რომლითაც მულტუფუნქციური ცენტრის საინჟინრო ქსელები უნდა მოეწყოს. 2024 წლის 27 დეკემბერს მერიამ 1,5 მილიონი ლარის ხელშეკრულება შპს “პარმაღს” გაუფორმა, რომელმაც აპრილის ბოლომდე უნდა მოაწყოს წყლის, კანალიზაციის, სახანძრო წყალსადენის, ვენტილაციის, გათბობა-გაგრილების და ელექტროსისტემები.
საქმე ისაა, რომ საინჟინრო ქსელების მოწყობისთვის თანხა უკვე იყო გამოყოფილი და ეს სამუშაოები “ართვინ ჯორჯიას” უნდა შეესრულებინა. შესყიდვის დოკუმენტებში არ ჩანს, რომ კომპანიას ეს ვალდებულება ჩამოშორდა. არც ის ჩანს, რომ ხარჯთაღრიცხვიდან საინჟინრო ქსელები ამოიღეს და შესაბამისად, ხელშეკრულების თანხაც შემცირდა.
ადგილზე მყოფ ინჟინერს ვკითხეთ, აპირებენ თუ არა საინჟინრო ქსელების მოწყობას, მაგრამ ეს დეტალები არ იცოდა. როგორც თავად გვითხრა, პირადად მას კონსტრუქციული და არქიტექტურული სამუშაოები ევალება.
ამ ბუნდოვანებაში გასარკვევად “ართვინ ჯორჯიას” საკონტაქტო ნომერზეც ვრეკავდით, მაგრამ მერიასთან გადაგვამისამართეს. არ გაგვკვირვებია, რომ ჩვენთან კომუნიკაცია არც მათ მოისურვეს. ქუთაისის მერია წლებია ასე იქცევა და ინტერვიუზე უარს გვეუბნება. სანაცვლოდ, ამჯერადაც, საჯარო ინფორმაციის გამოთხოვას გვირჩიეს. ამაზე არ დავთანხმდით, რადგან მერიის წარმომადგენლებს ჟურნალისტებთან პირისპირ ინტერვიუც ევალებათ და ყველა ჩვენს კითხვაზე 10 დღე ლოდინი არ უნდა გვიწევდეს.
რამ გააჭიანურა მულტუფუნქციური სივრცის დასრულება ორი წლით, რატომ გამოაცხადეს ახალი ტენდერი საინჟინრო ქსელებზე, რა გეგმები აქვთ უახლოეს მომავალში და აპირებენ თუ არა ახალი საპროექტო ორგანიზაციის დაქირავებას “ნს სტუდიოს” ნაცვლად – ეს იყო კითხვები, რომელიც მერიას მივწერეთ, მაგრამ, ჯერჯერობით, არ უპასუხიათ.
ინჟინრისგან გავიგეთ, რომ სამუშაოები გაზაფხულისთვის, მაისამდე უნდა დაასრულონ. დოკუმენტებით კი გეგმა-გრაფიკის დინება შეჩერებული აქვთ.
მასალაში გამოყენებული წყაროები