fbpx
imereti 13

სალომინაოს გზა: ფუჭი საარჩევნო დაპირება 

ავტორი: შორენა ლაღაძე 

სალომინაო ვანის მუნიციპალიტეტის სოფელია. 26 ოქტომბრის არჩევნებზე “ქართულმა ოცნებამ” აქ ხმების 62 პროცენტი მიიღო. [შემაჯამებელი ოქმის მიხედვით] როგორც ირკვევა, ხელისუფლების მთავარი წინასაარჩევნო დაპირება სალომინაოს გზების დაგება იყო, თუმცა არ შეასრულეს. 

სოფელში 21 იანვარს ჩავედით. ვანიდან მიმავალი ცენტრალური გზა ბეტონის კი არის, მაგრამ ყოველ ორ მეტრში ან ორმოები აქვს, ან ბზარები. უარესი მდგომარეობაა კაპანაძეების უბანში, სადაც 15 ადამიანი ცხოვრობს და ქვა-ღორღით დაფარულ გზაზე უწევთ სიარული. 

ე.წ კაპანაძეების უბნის გზა, ფოტო: 21 იანვარი

ადგილობრივები გვიყვებიან, რომ წინასაარჩევნო კამპანიისას, სოფელში მერის წარმომადგენელი მოდიოდა ხოლმე და არჩევნების მერე გზის დაგებას პირდებოდათ. არჩევნებმა ჩაიარა. შიდა საუბნო გზის დასაგებად 10 იანვარს გამოაცხადეს ტენდერი, ვანი-სალომინაოს ცენტრალური გზის ბედი კი ისევ გაურკვეველია. 

“გამგებელი შეგვპირდა – კიო, გაკეთდებაო და უნდა გაკეთდეს. გზა რომ არაა, გვაწუხებს, აბა რა, ორი აზრი არ არსებობს… ცენტრალურზე იყავით? ის ნორმალურია? ვანო ჯავახიშვილი ხუმრობდა მაგ გზაზე, ვანში ტბა გვაქვს უნიკალური, ასფალტის ფსკერი აქვსო. [გულისხმობს გზის სავალ ნაწილზე წყალი რომ გუბდება] 10 წლის წინ დაიგო და იმის მერე რესტავრაცია არ გაკეთებია. დაგებიდან 4-5 წლის მერე დაიწყო გაფუჭება და იმატებს და იმატებს… ზოგადად, ასეა, არჩევნების დროს კეთდება რაც კეთდება”, – გვითხრა ადგილობრივმა გია კაპანაძემ და დააყოლა, ‘გამგებელი’ ცუდი ადამიანი არ არის, ყურადღებიანიაო. ისიც გაგვიმხილა, სოფელი ცოტა ოპოზიციურადაა განწყობილი, რის გამოც, ყურადღებას არ აქცევდნენ, მაინცდამაინც, მაგრამ წელს მთავრობამ გაიმარჯვა და ალბათ, ყველაფერს გაგვიკეთებენო. 

სოფელ სალომინაოს ცენტრალური გზა, ფოტო: 21 იანვარი

“საუბნო გზას 10 წელიწადია გვპირდებიან და ახლა 100-პროცენტიანი გაკეთდებაო… თუ იტყუებიან, არ ვიცი, დღე-დღეზე გაკეთდებაო… [ცენტრალური გზა] გაფუჭებული კი არა, მომსპარია. ეს გზა აკავშირებს ზეინდარსა და სალომინაოს. ადრე, ისიც საარჩევნოდ გაკეთდა, წყალში აგებდნენ, მეორე დღეს იყო არჩევნები, წვიმდა და ისინი მაინც აგებდნენ. [ამ გზის ამბავზე] ორი წლის წინ ჩავედით ვანში და დეპუტატმა დაგვირეკა, მერი ვერაფერს გეტყვით, მე აგერ ვარო. [იხსენებს, რომ გზიდან მოაბრუნეს] ’’, – გვითხრა გიორგი კაპანაძემ.

მანაც დაგვიდასტურა,რომ ადგილობრივი მთავრობა მოსახლეობაზე შერჩევითად ზრუნავს, პოლიტიკური განწყობების მიხედვით. კაპანაძის თქმით, აქ ყურადღება მათ ექცევა, ვინც მთავრობის მხარდამჭერია, ჩვენ კი “წითელ ზონას” გვეძახიანო. 

რომ გაწვიმდება, ვიხრჩობით, ტალახი დგება… რა დასჭირდება ამას? 20 მანქანა ხრეში. უპატრონო ხალხი ვართ, მეზობლებს ვუთხარი, ივანიშვილს მიეცით ხმა და გზას გაგვიკეთებს, ეგ არის მეფე-თქო [იცინის]. იქეთ უბანში კი არის გზა, სადაც ივანიშვილს უჭერენ მხარს”, – გვითხრა სალომინაოს კიდევ ერთმა მოსახლემ, მაგრამ გვთხოვა, სახელი და გვარი არ გაამხილოთო. 

ერთადერთი ადგილობრივი ვნახეთ, რომელსაც ცენტრალური გზის უვარგისობა კი აწუხებდა, მაგრამ მთავრობაზე კრიტიკული არაფერი უთქვამს და ნიადაგს დააბრალა. 

ცენტრალური edited
სოფელ სალომინაოს ცენტრალური გზა, ფოტო: 21 იანვარი

“აყალო მიწაა აქ და ხო, [გზა პირდაპირ მიწაზე გააკეთეს]. აკეთებენ ყველაფერს, რომ ვთქვა არ აკეთებენ-თქო, ცოდვაა. ცოტა კი არ დაუსხიათ ბეტონი, ქვეყნის დაასხეს, მაგრამ გაფუჭდა. კი მაწუხებს, მაგრამ მჯერა, რომ გააკეთებენ. რასაც დაგვპირდნენ, გაგვიკეთეს”, – გვითხრა მან, ვინაობის გამხელის გარეშე. მისი საუბრიდან გავიგეთ, რომ ახლობლები საჯარო სამსახურში მუშაობენ და ღიად საუბარს ამიტომ ერიდებოდა. 

ვესაუბრეთ სოფელში ვანის მერის წარმომადგენელ ანზორ მებურიშვილს. ადგილობრივებმა სწორედ ის დაასახელეს დაპირებების ავტორად. მისგან გვაინტერესებდა, რატომ დააიმედა ხალხი ტყუილად, თუმცა ბოლომდე ვერ გაგვარკვია, ჩვენც აბსტრაქტულად გვითხრა – “რაღაცა მოიძებნებაო”. 

“მაგ გზა [ცენტრალური] იყო ჩასმული, მაგრამ არ გაკეთდა, სხვა პროგრამები გავიდა… შეხვედრა მქონდა, დღესაც ვიყავი [მერიაში] ჰოდა, რაღაცა [ფული] უნდა მოიძებნოს , უნდა გაკეთდეს მაგი აუცილებლად… ვნახოთ, წელს, მერმა მითხრა, გავაკეთებთო. მძიმე ტექნიკა დადიოდა მანდ, მაგაზე ერთი პირი იყო გადაგებული, მერე დადიოდა მანქანები გაბიონის ქვებით და დეფექტები აქვს მიღებული. შეტანილი მაქვს მაგი ყველაფერი მე, ჩემზე უფრო არავის არ აინტერესებს, რომ გასაკეთებელია მაგი… დაპირებით კი დამპირდა მერი და ვნახოთ, რა იქნება”, – გვითხრა მებურიშვილმა. 

გზის ამბავი ვკითხეთ ვანის მერიის სივრცითი მოწყობის, ინფრასტრუქტურისა და არქიტექტურის სამსახურის უფროს მამუკა ნამიჭეიშვილსაც. მანაც ბუნდოვანი პასუხი გაგვცა: “ამ ეტაპზე, პირველ ეტაპზე, არ არის. [დაგეგმილი] ისე, ზოგადად, ვფიქრობთ, კი. შეიძლება განვახორციელოთ წლის მეორე ნახევარში. პროექტი, ჯერჯერობით, არ არის. ვიცით გზის მდგომარეობა და წლის მეაორე ნახევრის მეორე ეტაპის დაფინანსებაზე შეიძლება განვიხილოთ…”. 

“კაპანაძეების უბნის” დაზიანებული გზა, ფოტო: 21 იანვარი

რაც შეეხება კაპანაძეების უბნის გზას, როგორც ჩანს, აქ არჩევნების შედეგებმა გაჭრა და ვანის მერიამ ტენდერი 10 იანვარს გამოაცხადა. გზის რეაბილიტაციის სავარაუდო ღირებულება 224 000 ლარია. გამარჯვებული კომპანია, წესით, დღეს, 31 იანვარს გამოვლინდება. 

დავაკვირდებით ამ ტენდერის მიმდინარეობას და ადგილობრივ მთავრობას ცენტრალური გზის დაგების დაპირებასაც აუცილებლად შევახსენებთ. 

კომენტარები
Total
0
Shares
Next
სოფელი შორაპანი ჩიხში – რა დისკომფორტს ქმნის ახალი ავტობანი? 
shorapani cov 03

სოფელი შორაპანი ჩიხში – რა დისკომფორტს ქმნის ახალი ავტობანი? 

ავტორი: შორენა ლაღაძე  21 დეკემბერს, რიკოთის ჩქაროსნული მაგისტრალის

თვალი მიადევნეთ სხვა ამბებსაც
Total
0
Share