ჭიათურის მერიამ მერის მოადგილის მეგობარს უკონკურსოდ 351,000 ლარის ხელშეკრულება გაუფორმა 2020-2021 წლებში. გიორგი ბიწაძე მერის მოადგილეა 2019 წლიდან, ნუგზარ ჩიკვილაძე კი მისი ბავშვობის მეგობარი და ნათესავია.
ნუგზარ ჩიკვილაძემ სამეწარმეო საქმიანობა 2003 წლიდან დაიწყო. საჯარო რეესტრის მონაცემების თანახმად, მას სულ 10 კომპანია აქვს. თუმცა, აქედან სახელმწიფო შესყიდვებში მხოლოდ 5 კომპანია მონაწილეობს, ისიც მას შემდეგ რაც მისი მეგობარი მერიაში დაინიშნა. შპს “მ და ნ”, შპს “ფორვარდ”, შპს “რევივალი”, შპს “ავანტი”, შპს “ჯეროჰამი” – ეს კომპანიები საჯარო რეესტრში გიორგი ბიწაძის მერის მოადგილედ დანიშვნის შემდეგ დარეგისტრირდნენ.
![მეგობრობა გზად და ხიდად ჭიათურის მერიაში 6 chikviladze1 1](https://ifact.ge/wp-content/uploads/2023/03/chikviladze1-1.png.webp)
მერიის მიერ ამ კომპანიებისთვის მიცემული ტენდერები, ძირითადად, გზის მოხრეშვის სამუშაოებს ეხება.
მერის მოადგილე, გიორგი ბიწაძე გვეუბნება, რომ ეს ხელშეკრულებები მათ მეგობრობას არ უკავშირდება: “რამდენიმე ხელშეკრულება აქვს სოფლის პროგრამებთან დაკავშირებით, დიდი არაფერი, ყველას უფორმდება მასე ხელშეკრულებები. სოფლის პროგრამა მთავრობის გადაწყვეტილებით იძლევა შესაძლებლობას, ერთ პირთან მოლაპარაკებით გაფორმდეს ხელშეკრულება”.
დავუკავშირდით ნუგზარ ჩიკვილაძესაც. ვკითხეთ, ჭიათურის მერიასთან დადებული ხელშეკრულებები, მის მეგობრობას ხომ არ უკავშირდებოდა. გვიპასუხა: “გიორგი ბიწაძე არ მიფორმებს მე ხელშეკრულებებს, სამწუხაროდ. ეგრე ახლა ირაკლისთანაც ვმეგობრობ, ღარიბაშვილთან და გასულ ხელისუფლებასთანაც, მაგრამ გამოცდილებაზეა აქ საუბარი.”