ვინ არის “ოცნების” დელეგატად მივლენილი გიორგი ჭყონია – ბიზნესმენი, კომფორტულად ორ ხელისუფლებასთან

ავტორი: ია ასათიანი

კვლევაზე მუშაობდნენ: მარიამ კაჭკაჭაშვილი და ეთო მიდელაშვილი

2024 წელს, საქართველოს ისტორიაში პირველად, სრულად პროპორციული არჩევნები ტარდება. ეს ძველი, მაჟორიტარული სისტემის დასასრულს ნიშნავს – აღარ ავირჩევთ მაჟორიტარ დეპუტატებს, რაც ხელისუფლებებს ყოველთვის ხელს აძლევდა, ხმების მოსაზიდად, მანდატების მოსაპოვებლად და პარლამენტში კონტროლის დასამყარებლად.

თუმცა, “ქართული ოცნების” გუნდი მაჟორიტარებს ვერ შეელია და ასეთ გამოსავალს მიაგნო – ყველა რეგიონს მიუვლინა დელეგატობის კანდიდატი. ისინი სიის სათავეში, გამსვლელ პოზიციებზე იქნებიან და მაჟორიტარების მსგავსად, პარლამენტში რეგიონებს წარმოადგენენ.

“… ამით ნაწილობრივ იქნება აღმოფხვრილი ის ნაკლოვანება, რომელიც არის დაკავშირებული მაჟორიტარული სისტემის გაუქმებასთან”, – თქვა პრემიერმინისტრმა კობახიძემ 15 აგვისტოს, როცა ქობულეთის ოლქის დელეგატად ბიზნესმენი გიორგი (გია) ჭყონია წარადგინა.

მაგრამ ვინ არის გიორგი ჭყონია და რატომ აირჩიეს ის? ამ სტატიაში მოგითხრობთ, რით დაიმსახურა ამ ადამიანმა “ქართული ოცნების” რჩეულობა, რა აკავშირებს ოლიგარქ ივანიშვილთან და რა გზა განვლო ბიზნესიდან პოლიტიკამდე.

გავლენიანი პოლიტიკოსების გვერდში მდგომი ბიზნესმენი

გიორგი (გია) ჭყონია 2006 წლიდან ბიზნესმენია. მართავს და ფლობს სასტუმროებს, რესტორნებს, სავაჭრო ცენტრებს, კრიპტოვალუტის ბიზნესს, სამშენებლო და დეველოპერულ კომპანიებს. ბიზნესმენობის პარალელურად, ახლო ურთიერთობები აქვს და ჰქონდა ხელისუფლებებთან – წარსულში “ნაციონალურ მოძრაობას” სწყალობდა, შემდეგ – “ქართულ ოცნებას”.

2012 წლის აგვისტოში, არჩევნებამდე ერთი თვით ადრე, ჭყონიამ და მისმა საქმიანმა პარტნიორმა “ნაციონალური მოძრაობის” სატელიტს, “საქართველო არ იყიდებას” 75 000 ლარი შესწირეს.

“გია ჭყონია წინა ხელისუფლების დროსაც კომფორტულად გრძნობდა თავს და არ იყო რიგითი ბიზნესმენი…შემიძლია დაგიდასტუროთ, რომ დიახ, “ნაციონალური მოძრაობის” მხარდამჭერი იყო და არასდროს ყოფილა ისე, თითქოს, გვერდზე იდგა ან რაიმე“, – გვითხრა ბათუმის საკრებულოში “ნაციონალური მოძრაობის” დეპუტატმა რევაზ ხარაზმა.

ჭყონიას წინა ხელისუფლებაში დასაყრდენი რომ ჰყავდა, კიდევ ერთ ოპოზიციურ პარტიაში გვიდასტურებენ.

“ბიზნესსექტორში არის ვარშალომიძედან მოყოლებული….შეიძლება მანამდეც მუშაობდა, მაგრამ ბიზნესში ფეხი აიდგა და განვითარდა “ნაციონალური მოძრაობის” დროს. აჭარაში ვარშალომიძის არაოფიციალურ პარტნიორად ითვლებოდა. მაგ დროს, მეც ბიზნესმენი ვიყავი და ვიცი… ქალაქში ყველამ იცის, რომ ლევანი “კრიშავდა”, – გვითხრა “გირჩი-მეტი თავისუფლების” ბათუმის ორგანიზაციის ხელმძღვანელმა თემურ გორგაძემ.

ჭყონია რომ ვარშალომიძის ფავორიტი ბიზნესმენი იყო, ამაზე მედიაც წერდა. “ბათუმელების” 2014 წლის სტატიის მიხედვით, მის კომპანია “გზას”, აჭარის მთავრობის ყოფილი თავმჯდომარის, ლევან ვარშალომიძის ძმა, ირაკლი ვარშალომიძე აკონტროლებდა. მას ხშირად ამჩნევდნენ “გზის” ოფისშიც.

წინა ხელისუფლებასთან “კომფორტულად ყოფნამ” ჭყონიას სულ არ შეუშალა ხელი იმაში, რომ “ქართული ოცნებისთვისაც” საიმედო ბიზნესმენი ყოფილიყო.

2016-2024 წლებში გიორგი ჭყონიამ, მისმა ოჯახმა და ბიზნესგარემოცვამ მმართველ პარტიას და სალომე ზურაბიშვილს 1.6 მილიონი ლარი ჩაურიცხეს.

ფინანსურად “გვერდში დგომის” გარდა, ბიზნესმენი მმართველ პარტიას სიტყვიერადაც ეხმარება და სამთავრობო პროპაგანდის გზავნილებს ერთი ერთში იმეორებს.

“ყველა წელიწადს დავეხმარები ‘ოცნებას’, იმიტომ რომ იყოს მშვიდობა… წარმოდგენა არ გაქვთ რა დღე იქნებოდა, რომ აყოლოდა ‘ოცნება’ და ჩვენი პრემიერი [ღარიბაშვილი] ვიღაც-ვიღაცების ხმებს და ჩავრთულიყავით ომში, შენც გასაქცევი გექნებოდა, მეც და ყველას…”, – უთხრა გიორგი ჭყონიამ ტელეკომპანია “ფორმულას”, 2023 წლის 2 დეკემბერში.

ახლა, გიორგი ჭყონიას გავლენიან მოკავშირეებზეც მოგიყვებით:

კავშირი 1 – ბიძინა ივანიშვილი

გიორგი ჭყონიას წარსული ბიძინა ივანიშვილთანაც იკვეთება. მედიაში გავრცელებული ინფორმაციით, ოლიგარქის დენდროლოგიურ პარკში გიგანტური ხეები მისმა კომპანიამ შპს “გზამ” გადაიტანა. ამავე კომპანიამ მოაწყო ამ ხეების “გასავლელად” საჭირო საავტომობილო ესტაკადაც, ჩაქვი-მახინჯაურის მონაკვეთზე. ამისთვის, შპს “გზას” საავტომობილო გზების დეპარტამენტმა ბიუჯეტიდან 6 მილიონ ლარამდე გადაუხადა.

ბიზნესმენისა და ოლიგარქის საერთო კავშირები დასტურდება იმითაც, რომ გიორგი ჭყონიას ბიზნესპარტნიორი ალლა კახნიაური “ქართუ ჯგუფში”, იურიდიულ სამსახურის ხელმძღვანელად მუშაობდა. ასევე არის სს “დაზღვევის კომპანია ქართუს” საბჭოს წევრი, რომლის გენერალური დირექტორიც ბიძინა ივანიშვილის დეიდაშვილი, არჩილ მამაცაშვილია.

მმართველ პარტიას ფულს ალა კახნიაურიც სწირავს. 2014-2020 წლებში მან “ქართულ ოცნებას” და “სალომე ზურაბიშვილს” ჯამში 85 ათასი ლარი ჩაურიცხა.

2020 წელს, ბიძინა ივანიშვილის შპს “საყვავილემ” თბილისის ისტორიულ ცენტრში, ორბელიანის მოედანზე უკანონოდ ააგო შენობა. ამ ამბით მედიის დაინტერესებიდან ორ დღეში ამ კომპანიის მფლობელობას თავად ჩამოშორდა და გიორგი ჭყონიას მიჰყიდა. 2020 წლის 21 თებერვალს, შპს “საყვავილე” გიორგი ჭყონიამ 1 მილიონ დოლარად იყიდა და დამატებით, “ბანკ ქართუში” 1.3 მილიონი ლარის სესხის დაფარვა დაევალა.

ეს გარიგება რომ თვალის ასახვევად სჭირდებოდათ, იმითაც დასტურდება, რომ გაყიდვიდან ოთხ დღეში, კომპანიის ახალ დირექტორად დანიშნეს 26 წლის თამთა ქენქაძე. მამამისი კი მედიასთან ამბობდა – ჩემს შვილს არასოდეს არსად უმუშავია და მის სამსახურზე არც ახლა ვარ ინფორმირებულიო.

სქემაზე ნახავთ, როგორ იყო შპს “საყვავილე” ბიძინა ივანიშვილის ვაჟის საკუთრებაში.

2022 წლის ოქტომბერში შპს “საყვავილე” თავისი ქონებით (1 143 კვ.მ მიწით და 3 254 კვ.მ შენობით) გიორგი ჭყონიამ 3 მილიონ აშშ დოლარად შპს “ბიზნეს ცენტრ პირიმზეს” მიჰყიდა. ამ კომპანიის მფლობელები ჩინეთის და კამბოჯის მოქალაქეები არიან.

გიორგი ჭყონიამ ბიძინა ივანიშვილის “ბანკი ქართუსგანაც” იხეირა. 2020 წლის თებერვალში,“ბანკმა ქართუმ” თავისი კუთვნილი ქონება სახელმწიფო საკუთრებაში გადაცვალა. ბაკურიანში, “დიდველზე” მდებარე 3 445 კვ.მ ნაკვეთი და 1 758 კვ.მ მშენებარე ნაგებობა სახელმწიფოს გაუცვალა 2.3 მილიონი ლარის ღირებულების შვიდ სხვადასხვა მიწის ნაკვეთში:

• ჯამში 10 079 კვ.მ სამი ნაკვეთი ბაკურიანში;
• 34 492 კვ.მ ლისის ტბასთან;
• ჯამში 3 374 კვ.მ ორი ნაკვეთი აბასთუმანში;
• 1 310 კვ.მ ხელვაჩაურში, მწვანე კონცხზე.

რა ბედი ეწია ლისის ტბის ქონებას? ერთ წელში, 2021 წლის აპრილში “ბანკმა ქართუმ” ეს ქონება გიორგი ჭყონიას 1.5 მილიონ ლარად მიჰყიდა. ანუ, 1 კვ.მ 42 ლარად.

ბიზნესმენმა ქონება ჯერ “ბანკი ქართუს” იპოთეკით დატვირთა და 2 მილიონი ლარი აიღო, შემდეგ კი თავისი კომპანიის, “თაუერ ჯგუფი პანორამა ლისის” საწესდებო კაპიტალს შემატა.

2023 წელს გიორგი ჭყონიამ ამ ტერიტორიაზე ელიტური უბნის, “ლისი პანორამას” გაშენება დაიწყო.კომპანია ამ უბნის ნაკვეთებსაც ჰყიდის და უკვე აშენებულ ვილებსაც. ჯამში, პროექტი ითვალისწინებს ტბის და ქალაქის ხედით 40-ზე მეტ ვილას, თავისი აუზებით, კომერციული სივრცეებით, სტადიონით და საპარკინგე ადგილით.

“ლისი პანორამას” განაშენიანების გეგმა უკვე დამტკიცებულია და როგორც კომპანიაში გვეუბნებიან, რამდენიმე ნაკვეთი უკვე გაყიდეს კიდეც.

ეს ბიზნესიც სარფიანი ჩანს. როგორც “თაუერ ჯგუფში” გვითხრეს, აქ ერთი კვადრატული მეტრი მიწა 180 აშშ დოლარი ღირს. შეგახსენებთ, რომ აქ 1 კვ.მ ნაკვეთი გიორგი ჭყონიამ მხოლოდ 42 ლარად იყიდა.

კავშირი 2 – კახაბერ კუჭავა

“ქართული ოცნების” გულუხვ შემწირველს რომ ამ პარტიის ლიდერებთან დიდხნიანი კავშირები აქვს, იმითაც დასტურდება, რომ მათთან ერთად ბიზნესს იწყებს. 2024 წლის ივნისში, გიორგი ჭყონიამ პარლამენტის ყოფილ თავმჯდომარესთან, კახაბერ კუჭავასთან ერთად დააფუძნა შპს “თაუერ გრუფი ურეკი”. მისი საქმიანობის სფეროს ვერც საჯარო რეესტრიდან ვიგებთ და ვერც სტატისტიკის სამსახურიდან.

კავშირი 3 – არჩილ ხაბაძე

როგორც ჩანს, გიორგი ჭყონია დაახლოებულია აჭარის ა/რ-ის მთავრობის ყოფილ თავმჯდომარესთან და “ქართული ოცნების” ყოფილ დეპუტატ არჩილ ხაბაძესთანაც. ის თავადაც არ უარყოფს “ბინიუსის” ჟურნალისტური გამოძიებით გამოაშკარავებულ ფაქტებს, რომ მეგობრობენ და საზღვარგარეთ ოფიციალურ ვიზიტებშიც ერთად დადიან. მაგალითად, 2015 წელს, ისინი ერთად იყვნენ სტრასბურგში, “ევროპის საბჭოს ადგილობრივ და რეგიონალურ ხელისუფალთა კონგრესში”. მედიაში გავრცელებულია მტკიცებულებებიც, რომ არჩილ ხაბაძე შპს “გზის” ოფისსაც სტუმრობდა.

ერთი შეხედვით, ბიზნესმენისა და პოლიტიკოსის პირადი თუ საქმიანი კავშირები არ უნდა გვიკვირდეს, ვერც მათ მეგობრობას მოვედავებით. თუმცა, ყურადღებამისაქცევი არის ის ფაქტი, რომ ჭყონიასთან დამეგობრებული არჩილ ხაბაძე 2012-2016 წლებში აჭარის ა/რ-ის მთავრობის თავმჯდომარე იყო. სწორედ ამ პერიოდში, ჭყონიას კომპანიებმა აჭარის ა/რ-ის საჯარო უწყებების, ასევე ბათუმის, ქედის და ქობულეთის მუნიციპალიტეტებთან 50 სახელმწიფო შესყიდვის ხელშეკრულება გააფორმა – ჯამში, 17.4 მილიონი ლარის.

კავშირი 4 – თენგიზ პეტრიძე

კიდევ ერთი გავლენიანი პოლიტიკოსი, რომელთანაც გიორგი ჭყონიას საქმიანი ურთიერთობა აქვს, ბათუმის ყოფილი ვიცემერი, თენგიზ პეტრიძეა. ის 2020 წლიდან გიორგი ჭყონიას კომპანიის, შპს “თაუერ ჯგუფის” დირექტორია.

2011-2015 წლებში, გიორგი ჭყონიას შპს “გზამ” ბათუმის მერიის 18 ტენდერი მოიგო – ჯამში 17.9 მილიონი ლარის ღირებულების. აქედან 15 მილიონი ლარის ღირებულების 15 ტენდერში სატენდერო სხდომის ოქმებს თენგიზ პეტრიძე აწერდა ხელს, როგორც კომისიის ერთ-ერთი წევრი ან კომისიის თავმჯდომარის მოადგილე. ამ პერიოდში, პეტრიძე ბათუმის მერიის კეთილმოწყობის სამსახურის უფროსი, ან უფროსის მოადგილე იყო.

თენგიზ პეტრიძე 2019 წლის მაისში დააკავეს -სამსახურებრივი მდგომარეობის ბოროტად გამოყენების და დიდი ოდენობით თანხის გაფლანგვის ბრალდებით. პროკურატურა პეტრიძეს და კიდევ 6 მაღალჩინოსანს ერთ კომპანიაზე ტენდერის მორგებას ედავებოდა. 2019 წლის ოქტომბერში თენგიზ პეტრიძე 20 000-ლარიანი გირაოთი გათავისუფლდა.

გიორგი ჭყონია, როგორც დელეგატი – რას ნიშნავს და ვის აწყობს ეს პოზიცია?

უკვე ვიცით, რომ ხალხის ნების შემთხვევაში, გიორგი ჭყონია ქობულეთის დელეგატი იქნება. ეს პოზიცია “ქართულმა ოცნებამ”, ფაქტობრივად, გამოიგონა. 2024 წლის 15 მაისს ცვლილებები შევიდა საარჩევნო კოდექსში და პარტიებს მიეცათ უფლება, პროპორციული სიიდან მათთვის სასურველი 30 ადამიანი ამა თუ იმ რეგიონის დელეგატად მოიაზრონ.

მთავრობა გვიმტკიცებს, რომ ამ სიახლის მიზანი რეგიონის პრობლემებზე უკეთ ზრუნვაა. სამართლიან და თავისუფალ არჩევნებზე მომუშავე მკვლევრები კი ფიქრობენ, რომ “ქართულმა ოცნებამ” მაჟორიტარები დააბრუნა.

“[მმართველმა პარტიამ] თქვა, რომ ეს ადამიანები იქნებიან ოლქის კურატორები…ოლქის კურატორობა ნიშნავს, რომ მან მაჟორიტარების სტატუსი დააბრუნა პროპორციულ საარჩევნო სისტემაში… პროპორციული არჩევნები დელეგატების ინსტიტუტს საერთოდ არ ცნობს. ასეთი რამ არც ერთ ქვეყანაში არ ხდება და არც არჩევნების თეორიებში წერია. ვერსად იპოვით მსგავს ჩანაწერს,”- გვითხრა “რეფორმებისა და კვლევის ჯგუფის” აღმასრულებელმა დირექტორმა, გულად ქანთარიამ.

“სამართლიანი არჩევნებისა და დემოკრატიის საერთაშორისო საზოგადოება” isfed-იც ფიქრობს, რომ დელეგატების გამოგონება პროპორციული საარჩევნო სისტემის არსს ეწინააღმდეგება.

“…ამ სიახლემ, შესაძლოა, ამომრჩეველი შეცდომაში შეიყვანოს. ამასთანავე, აღსანიშნავია, რომ ადგილობრივი მოსახლეობისთვის შექმნილ საჭიროებებზე მყისიერი რეაგირება, დეცენტრალიზაციის სტანდარტის მიხედვით, შესაბამისი მუნიციპალიტეტის ორგანოების პასუხისმგებლობაა”, – ვკითხულობთ isfed-ის 2024 წლის წინასაარჩევნო ანგარიშში.

აჭარაში ოპოზიციური პარტიების წარმომადგენლებს ვკითხეთ, რატომ აირჩიეს ქობულეთის დელეგატობის კანდიდატად მაინცდამაინც გიორგი ჭყონია. მათი თქმით, გამოცდილი ბიზნესმენი დელეგატის როლში მოხვეჭილი სიმდიდრის და რეგიონში ფინანსური გავლენების გამო მოგვევლინა.

“ქობულეთში “ქართული ოცნების” დელეგატად სხვა ვერც წარმოგვედგინა… ის [ჭყონია] ივანიშვილის კარის ბიზნესმენია, შესაბამისად, ძალიან დიდი გავლენა აქვს ხელისუფლებაზე… “ქართულ ოცნებას” ჰგონია, რომ გია ჭყონია ქობულეთში ჩავა, იქაურებს ფულს დაურიგებს და მოისყიდის. მას ახლა ივანიშვილის კარზე ერთადერთი ფუნქცია აქვს – ის ფინანსური რესურსი, რომელიც “ქართული ოცნების” პირობებში დაუგროვდა, ისევ “ქართულ ოცნებას” მოახმაროს,” – გვითხრა ბათუმის საკრებულოში “ნაციონალური მოძრაობის” დეპუტატმა რევაზ ხარაზმა.

“მაგ კაცს პოლიტიკასთან დაკავშირებით არაფერზე წარმოდგენა არ აქვს. გარდა იმისა, რომ იცის, როგორ აკეთოს “მაყუთი.” დარწმუნებული ვარ, მასაც არ უნდა [პოლიტიკაში ყოფნა], უბრალოდ, სხვა ვერავინ იშოვა “ქართულმა ოცნებამ” და მოიყვანა ისეთი ადამიანი, ვის გასაპიარებლადაც ბიძინას ფულის დახარჯვა არ მოუწევს…”, – გვითხრა “გირჩი-მეტი თავისუფლების” ბათუმის ორგანიზაციის ხელმძღვანელმა თემურ გორგაძემ.

გიორგი ჭყონიას ბიზნესმენობის და პოლიტიკოსებთან მეგობრობის ფონზე მოხვეჭილი ქონება ასე გამოიყურება.

“სამართლიანი არჩევნები”/isfed-ი2024 წლის სექტემბერში გამოქვეყნებულ ანგარიშში, გიორგი ჭყონიას მხრიდან სავარაუდო მოსყიდვის ფაქტზე საუბრობს:

“21 აგვისტოს [გიორგი ჭყონიამ] დაბა ოჩხამურის მოსახლეობას საჩუქრად წყალი გადასცა. ადგილობრივებმა მანამდე უწყლობა გააპროტესტეს და რამდენიმე წუთით საგზაო მაგისტრალი გადაკეტეს. ჭყონიამ ადგილობრივ მოსახლეობას საჩუქარი თავისივე კომპლექსის – „შატო კვირიკეს“ თანამშრომლების მეშვეობით გაუგზავნა, ტრანსპორტირება კი კომპლექსის ავტომობილებით მოახდინა. მომსახურეები მათ ეუბნებოდნენ, რომ წყალი მათ ჭყონიამ აჩუქა”.

სარგებელი სახელმწიფოსგან

შემოსავალი ტენდერებიდან

გიორგი ჭყონია 31 კომპანიის მფლობელია. მათგან სამი კი სახელმწიფო შესყიდვებით მილიონობით ლარის შემოსავალს იღებს. 2011 წლიდან დღემდე, “ბათუმი ცენტრალმა”, “შატო კვირიკემ”(ემ-თი-ეს) და “გზამ” ჯამში 457 მილიონი ლარის 186 ხელშეკრულება გააფორმეს. კომპანიები ტენდერების 73 პროცენტს უკონკურენტოდ იგებს.

არ დაჰკლებიათ არც უკონკურსო, გამარტივებული შესყიდვები. ჭყონიას სამმა შპს-მ 2011-2024 წლებში ამ გზით 10 მილიონი ლარის 83 ხელშეკრულება გააფორმა.

ჩვენი ყურადღება მიიქცია შპს “გზას” რამდენიმე ტენდერის საეჭვო გარემოებამ – სატენდერო პირობები იყო დაწვრილმანებული და ითხოვდნენ ძალიან ვიწრო სამუშაო გამოცდილებას – მაგალითისთვის, 2024 წლის ივნისში აჭარაში გამოცხადდა შესყიდვა ახალ ბულვარში სტიქიის შედეგად დაზიანებული ბილიკის აღსადგენად და შტორმისგან დამცავი ნაგებობის ასაშენებლად.

შემსყიდველის პირობა იყო, რომ გაიმარჯვებდა ის კომპანია, რომელსაც 2021 წლიდან ერთი ხელშეკრულების ფარგლებში ექნებოდა ლითონის შპუნტებით ნაპირსამაგრის მოწყობის გამოცდილება, ხოლო ამ სამუშაოების ღირებულება მინიმუმ 2 000 000 ლარი უნდა ყოფილიყო.

ამ ამბავში ეჭვი შეიტანა ტენდერში შესვლის სხვა მსურველმა შპს “ბუფალო 2023”-მაც და სატენდერო კომისიას ჰკითხა – რისთვის იყო საჭირო ლითონის შპუნტებზე ამხელა გამოცდილება, როცა მათ ბეტონის კედელი და ფილა უნდა მოეწყოთ.

გიორგი ჭყონიას და “ქართული ოცნების” ურთიერთობაზე შეიძლება ითქვას “ხელი ხელს ბანსო”. მის კომპანიებს ტენდერები 2017 წლიდან მოუმრავლდათ. სწორედ ამ პერიოდიდან გაჩნდნენ “ოცნების” მსხვილ შემომწირველთა რიგებში გიორგი ჭყონია, მისი ოჯახი და ბიზნესგარემოცვა.

ხოლო 2013-2016 წლებში, როცა “ქართული ოცნების” გუნდი ხელისუფლებაში ახალი მოსული იყო, ჭყონიას კომპანიების ტენდერები წლიდან წლამდე იკლებდა. შესაბამისად, ის და მისი გარემოცვა პარტიას ფულს არ ურიცხავდა.

წარმატებული ტენდერების და პარტიის შეწირულობების დინამიკა 2016-2024 წლების მიხედვით ასე გამოიყურება:

ყურადღებამისაქცევია ის ფაქტი, რომ რატომღაც, ბიზნესმენ გიორგი ჭყონიასთან დაკავშირებულ პირებს თანხის შეწირვა ერთ დღეს აფიქრდება. მაგალითად, 2018 წელს გიორგი ჭყონიამ, მისმა ორივე ძმამ და ხუთმა სხვადასხვა ბიზნესპარტნიორმა სალომე ზურაბიშვილს ფული 27 ნოემბერს ჩაურიცხეს. ასე შეხმატკბილებულად იქცევიან თითქმის ყოველ წელს.

გიორგი ჭყონიასთან ინტერვიუს ჩაწერა გვსურდა, რომ მისგან გაგვეგო, როდის და რატომ გადაწყვიტა ბიზნესიდან პოლიტიკაში წასვლა, რას ნიშნავს მისთვის დელეგატობა და რისი თქმა შეუძლია იმ ეჭვების გასაქარწყლებლად, რომ მისი ბიზნესის წარმატება ხელისუფლებებთან სიახლოვემ და მმართველი პარტიების დონორობამ განაპირობა.

გიორგი ჭყონია ჩვენს ზარებსა და ტექსტურ შეტყობინებას არ პასუხობს. კონტაქტზე გასვლა მისი კომპანიების გავლითაც ვცადეთ. სამ კომპანიას ოფიციალურ მეილზე მივწერეთ, ხოლო შპს “გზის” ფინანსურ მენეჯერს ელ.ფოსტის გარდა ტელეფონზეც ვურეკავდით. მათ შეტყობინებებით ვთხოვდით, რომ გიორგი ჭყონიასთან გადავემისამართებინეთ, მინიმუმ მისი ელ.ფოსტის მისამართი მაინც მოეწერათ. მიუხედავად არაერთი მცდელობისა, გიორგი ჭყონია არ გამოგვხმაურებია. შესაბამისად, გვიწევს, რომ სტატია მისი პოზიციის გარეშე გამოვაქვეყნოთ.

“აწარმოე საქართველოში”- “შატო კვირიკეს” და “შალე კვირიკეს” ამბავი

ქობულეთში, გიორგი ჭყონიას ორი სასტუმრო კომპლექსი აქვს. “შატო კვირიკე” ქალაქში, ზღვის მიმდებარედ და “შალე კვირიკე” – მთიან სოფელ კვირიკეში. ორივე ლოკაციაზე განთავსებულია 35-ზე მეტი კოტეჯი, შატო, მარანი, ვენახი, რესტორანი, მუზეუმი და საკონფერენციო/საბანკეტო დარბაზები.

[“შატო კვირიკე” ქობულეთში, კლდიაშვილის ქუჩაზე]

ამ ბიზნესისთვის საჭირო ტერიტორია გიორგი ჭყონიას ხელში სახელმწიფოს წყალობით მოხვდა. 2019 წლის ნოემბერში სოფელ კვირიკეს შემოგარენში, 26 870 კვ.მ ტყის ფონდის მიწა სახელმწიფომ დაირეგისტრირა. ერთ თვეში კი ეს ქონება აუქციონზე გაიტანა და საბოლოოდ, 16 იანვარს 49-წლიანი იჯარით გასცა.

მოიჯარე არის გიორგი ჭყონიას შპს “შატო კვირიკე”/MTS. კომპანიამ აუქციონამდე თვენახევრით ადრე ქონების ეროვნულ სააგენტოს წერილი გაუგზავნა, რომელიც აუქციონის გამოცხადების საფუძველი გახდა.

ჭყონიას კომპანია ამ ტერიტორიაში სახელმწიფოს წლიურად 2 090 ლარს უხდის – თვეში 174 ლარის, ანუ თვიურად 1 კვ.მ მიწაში მხოლოდ 0,006 თეთრს.

შპს “შატო კვირიკეს” დაევალა ერთ წელში 300 000 ლარის ინვესტირება და მიმდებარე ტერიტორიის მოვლა-პატრონობა-დასუფთავება.

აჭარის სატყეო სააგენტოს ბრძანებაში ვკითხულობთ, რომ ჭყონიას ქონება გადაეცა “რეკრეაციული ტყით სარგებლობის მიზნით, დროებითი შენობების ან/და ნაგებობების განთავსების უფლებით”.

“დროებითი შენობების” სახით ახლა აქ “შალე კვირიკეს” 22 კოტეჯი დგას, რომელთა საერთო ფართობიც ჯამში 1 415 კვ.მ-ია. სასტუმრო კომპლექსი 2023 წელს გაიხსნა. ეს პროექტი შავი ზღვის მიმდებარედ, “შატო კვირიკეს” ერთგვარი გაგრძელებაა.

ორივე პროექტის გახსნის და გაფართოების თანადაფინანსება მოხდა ეკონომიკის სამინისტროს პროგრამით “აწარმოე საქართველოში”. კონკრეტულად კი “უმასპინძლე საქართველოშის” ფარგლებში 5 მილიონ ლარზე მეტი გამოიყო.

უცნობია, კონკრეტულად რა სამუშაოებს მოხმარდა ეს 5 მილიონი ლარი, რადგან “აწარმოე საქართველოში” ამ მონაცემებს აღარ გვაწვდის.

ზუსტად ვიცით მხოლოდ ის, რომ შპს “შატო კვირიკემ” ამ პროგრამის ფარგლებში “ბანკი ქართუსგან” აიღო 7,5 მილიონი ლარის სესხი, რომლის პროცენტის ნაწილს სახელმწიფო დაუფარავს. გამოდის, “აწარმოე საქართველოშის” ბიუჯეტიდან ფული “ბანკ ქართუში” მიდის.

გიორგი ჭყონიას სარგებელი ამით არ ამოწურულა. “შალე კვირიკემ” სტუმრები რომ მარტივად მიიღოს, ამაშიც სახელმწიფო რესურსი გაიხარჯა.

კვირიკეს დასახლებული პუნქტიდან ტყემდე სამანქანო გზა არასოდეს მიდიოდა. სოფლის მკვიდრი მოსახლეობა დაზიანებული გზის შეკეთებას სულ სხვა მხარეს, ჰესის მიმართულებით ითხოვდა. ამის მიუხედავად, აჭარის ა/რ-ის გზების დეპარტამენტმა უპირატესობა მიანიჭა “ტურისტულ მნიშვნელობას” და გიორგი ჭყონიას კოტეჯებამდე გზის დასაგებად 2.2 მილიონი ლარი დახარჯა.

ეს თანხა ისევ გიორგი ჭყონიას კომპანიაში წავიდა – რაც არ უნდა გასაკვირი იყოს, კოტეჯებთან მისასვლელი გზა, თავისივე კომპანიამ, შპს “გზამ” დააგო.

“ახალი კურორტი ემატება ქობულეთს და აჭარას, სახელმწიფომ უნდა დაგვიდგეს ყველას გვერდით, რომ სხვებიც ავიდნენ შემდეგში”, – ამბობდა ბიზნესმენი გიორგი ჭყონია 2022 წლის ივნისში “ნეტგაზეთთან” ინტერვიუში.

როგორც ჩანს, სახელმწიფოს თანადაფინანსებით და პრივილეგირებული პირობებით აწყობილი ბიზნესი სარფიანი გამოდგა. “შატო კვირიკესა” და “შალე კვირიკეს” კოტეჯებში ერთი ღამის გათევა 250-300 ლარი ღირს.

“შალე კვირიკეს” კომპლექსის ექსპლუატაცია საჯარო რეესტრში დაფიქსირებული არ არის. რეესტრის 2023 წლის 6 მარტის განცხადებით, კომპანიამ ვერ წარუდგინათ ექსპლუატაციისთვის აუცილებელი დოკუმენტაცია და პროცესი შეაჩერეს.

პრობლემის მოსაგვარებლად კომპანიას ერთი თვე ჰქონდა, თუმცა ვადა ისე ამოიწურა, რომ ექსპლუატაციისთვის საჭირო ნაბიჯები აღარ გადაუდგამთ.

იჯარა იუსტიციის სახლისთვის

ბიზნესმენმა და ახლა უკვე “ქართული ოცნების” დელეგატობის კანდიდატმა ჭყონიამ სახელმწიფოსგან სარგებლის მიღების კიდევ ერთი გზა იპოვა – საკუთარი უძრავი ქონების გაიჯარება.

“გამჭვირვალობა-საქართველოს” ინფორმაციით, 2024 წლის ივლისში, იუსტიციის სამინისტრომ ბათუმის იუსტიციის სახლისთვის 445 კვ.მ ფართი გიორგი ჭყონიას “ბათუმი ცენტრალისგან” იქირავა. ამ ფართში ჭყონიას კომპანია სამ წელში 2.1 მილიონ ლარს აიღებს.

როგორც სტატიიდან გაიგეთ, “ქართულმა ოცნებამ” ქობულეთს დელეგატად მიუვლინა ადამიანი, რომელიც არაერთხელ მონაწილეობდა კორუფციის რისკისშემცველ გარიგებებში და არაერთხელ უსარგებლია სახელმწიფო ბიუჯეტითაც – გავლენიანი მეგობრების წყალობით. ამით ბიზნესი გაიძლიერა და სიმდიდრე მოიხვეჭა.

აი, ასეთი წარსულის მქონე გიორგი ჭყონია აპირებს ახლა ქობულეთის დელეგატობას. თუ “ქართულ ოცნებას” ჩანაფიქრი გამოუვიდა, სახელმწიფო რესურსები და ბიზნესინტერესები კიდევ უფრო გადაიჯაჭვება. შედეგად კი ჩნდება რისკი, რომ მეტი საქმე მოგვარდეს უკვე კარგად ნაცადი მეთოდით – “ქართულ ჯიგრულ პონტში”.

მასალაში გამოყენებული წყაროები

მასალის გამოყენების პირობები